«UzBuild – 2023» halyqaralyq qurylys kórmesi ótip jatyr.
TMD keńistigindegi eń aýqymdy shara bıyl Tashkentte uıymdastyryldy. Álemniń 22 memleketinen 350-ge tarta kompanıa qurylys materıaldaryn tanystyrdy, dep habarlaıdy Almaty-akshamy.kz 24.kz-ke silteme jasap.
Qazaqstan kórmege gazoblok, polıýretan, taqtaısha, jylý oqshaýlaǵysh jáne túrli-tústi boıaý ónimderin usyndy. Arnaıy qurylys tehnıkasy men metal buıymdar da bar. Bulardyń kóbiniń Ózbekstan naryǵynda balamasy joq. Sondyqtan jergilikti merdigerler tarapynan joǵary suranys ıe bola bastady. Al gazoblok shyǵaratyn zaýytqa Grýzıada óndiris ashý jóninde usynys jasaldy. Qazirdiń ózinde kásiporynnyń elimiz ben Ózbekstanda birneshe óndiristik alańy bar. Taǵy bir ereksheligi, Qazaqstanda jasalatyn beton taqtaıshalar endi Tashkent qalasyn abattandyrýǵa qoldanylýy múmkin. Óndirýshi kórme barysynda birneshe komersıalyq kelisim jasap úlgerdi.
«Osy kúnderi qalany araladyq.Abattandyrý jaǵynan áleýeti mol eken. Almaty sekildi bezendirýge keletin qala», - deıdi taqtaısha shyǵaratyn zaýyt dırektorynyń orynbasary Álıa Ómirálıeva.
«Boıaý shyǵaratyn álemdik brendtiń Qazaqstanda ókildigi bar. Almaty mańyndaǵy zaýytta daıyndap, Ortalyq Azıa naryǵyna taratamyz. Boıaýdyń san túri shyǵarylady. Ózbekstan - jańa naryq. Munda bıznesti damytýǵa kóp múmkindik bar», - deıdi boıaý shyǵaratyn kompanıanyń saýda menedjeri İlıas Beısenbek.