Búgin tehnıkalyq jáne kásiptik bilim berý uıymdaryna qujat qabyldaý bastaldy
Abıtýrıentter kolejde oqýǵa eki tásilmen ótinim bere alady: 25 maýsymnan bastap qaǵaz túrinde jáne 1 shildeden bastap egov.kz portaly arqyly elektrondy nysanda, dep habarlaıdy Almaty-akshamy.kz Oqý-aǵartý mınıstrligine silteme jasap.
9 synyp bitirýshiler úshin qujat qabyldaý merzimi 25 maýsymnan 18 tamyzǵa deıin, al 11 synyp bitirýshiler úshin 25 maýsymnan 20 tamyzǵa deıin jalǵasady:
- shyǵarmashylyq mamandyqtar boıynsha – 25 maýsymnan 20 shildege deıin,
- pedagogıkalyq jáne medısınalyq mamandyqtar boıynsha – 25 maýsymnan 15 tamyzǵa deıin.
Orta býyn mamandyqtary men qoldanbaly bakalavrǵa túsýshiler úshin oqýǵa qabyldaý atestattyń ortasha baly negizinde júrgiziledi. Baǵalap bólý mindetti jáne beıindik pánderdiń ortasha konkýrstyq baly negizinde avtomattandyrylǵan aqparattyq júıe arqyly júzege asyrylady.
Jumysshy mamandyǵyna túsetin túlekter áńgimelesý qorytyndysy boıynsha qabyldanady.
Pedagogıkalyq, medısınalyq jáne shyǵarmashylyq mamandyqtar boıynsha oqýǵa túsetin túlekter arnaıy jáne shyǵarmashylyq emtıhandar tapsyrady nemese áńgimelesýden ótedi. Ony qabyldaý komısıalary júrgizedi. Oqýǵa túsýshiler úshin konkýrstar 19-25 tamyz, óner jáne mádenıet mamandyqtary boıynsha 29 shilde-2 tamyz aralyǵynda ótedi.
Aıta ketý kerek, talapkerler qujattardy birden 4 kolejge 4 mamandyq boıynsha tapsyra alady. Bıylǵy jyly memlekettik bilim berý tapsyrysy boıynsha barlyǵy 145 myń abıtýrıentti oqýǵa qabyldaý josparlanýda, bul ótken jyldan 10 myń orynǵa artyq.