Qazaqstandyq eki jasóspirimge «Qazaqstan halqyna» qory kómegimen zamanaýı protez satyp alyndy.
Adamnyń júıke júıeleri arqyly basqarylatyn ınovasıalyq jasandy qoldardy Talǵar aýdany, Belbulaq aýylyndaǵy jeke klınıkanyń mamandary jasaǵan, dep habarlaıdy Almaty-akshamy.kz 24.kz-ke silteme jasap.
38 mln teńge turatyn protezder qor qarajatynan óteldi. Atyraý oblysynan kelgen Aqmóldir Tileýqulovanyń týǵannan beri sol qoly shyntaǵynan joq. Muny kemistik emes, erekshelik dep qabyldaǵan ol: «Taǵdyrǵa moıyǵan kezim joq», – deıdi. Bala kezinen sportty serik etken qaısar qyz qazir Dene shynyqtyrý jáne sport mamandyǵy boıynsha bilim alyp júr. Ústel tenısine qatysady. Jańa protezge de tez beıimdelip alypty.
«Osyny estigen kezde, qýanyp kettim. Burynǵy protezdi jáı ǵana bar sıaqty sezingenmen, qazirgi protez ashylyp-jabylyp, ár zatyńdy ustaı beresiń. Esikti de ashyp úırendim», - deıdi emdelýshi Aqmóldir Tileýqulova.
Bıonıkalyq protez júıke júıeleri arqyly basqarylady. Iaǵnı jasandy qol bulshyq etterdiń jıyrylýyna jaýap beretin sensorlarmen jabdyqtalǵan. Naýqasqa kıgizer kezde arnaıy baǵdarlama arqyly iske qosylady.
«Bul protezder adamnyń muqtajdyqtaryna qolaıly etip jasalǵan. Pasıent kúndelikti ómirde eshqandaı qıyndyqsyz qımyldaı alady. Sońǵy tehnologıamen jasalǵan protezderdi 20 kúnde daıyndap, qoldanýǵa beremiz. Mundaı protezder tek Qazaqstanda ǵana tegin berilýde. Basqa elderde memleket tarapynan standartty protezder ǵana jasalady», - deıdi tehnık-protezshi Isak Shaaban.
Qordyń shapaǵatyn kórgen Aqmóldir ǵana emes. «Qazaqstan halqyna» qory arqyly buǵan deıin 41 naýqas zamanaýı protezge ıe bolǵan. Keler jyly mamyr aıyna deıin taǵy 150 múmkindigi shekteýli adamǵa bıonıkalyq protez qoıý josparda bar.