Qazaqstanda ázirlengen materıal joldamuzdyń paıda bolýynyń aldyn alady, asfáltty buzbaıdy jáne ekologıaǵa zıan keltirmeıdi.
Qazaqstan jol ǵylymı-zertteý ınstıtýtynyń ǵalymdary Astanada ótip jatqan jol kórmesinde jaqynda patenttelgen kóktaıǵaqqa qarsy materıaldyń tusaýkeserin ótkizdi, dep habarlaıdy Almaty-akshamy.kz.
Atalǵan materıaldyń basty ereksheligi – tómen temperatýranyń keń dıapazonynda muzdy eritý qabileti, ıaǵnı 0-den -30°C-qa deıin.
Sonymen qatar quramyndaǵy kálsı óz kezeginde beton jabyndarynyń beriktigin nyǵaıtady jáne olardyń betin qabyrshaqtanýdan qorǵaıdy, al fosfor jol boıyndaǵy jasyl keńistikterge jaǵymdy áser etedi.
Ónertabys avtorlarynyń aıtýynsha, atalǵan jańashyldyqtyń muzǵa qarsy basqa suıyqtyqtardan aıyrmashylyǵy – jańa reagent formýlasynda joldardy buzatyn, ósimdikterdi keri áser etetin jáne kólikke zaqym keltiretin natrıı hlorıdi, ıaǵnı qarapaıym tuz joq.
«Biz -10°C deıin jaqsy jumys isteıtin kóktaıǵaqqa qarsy sheteldik tehnologıalar muzdy jartylaı ǵana eritetinin jáne temperatýranyń odan ári tómendeýimen erigen sý qaıtadan qatyp qalatynyn baıqadyq. Bul óz kezeginde kóktaıǵaqqa ákep soǵady. Bul máseleni túbegeıli sheshý úshin biz kóktaıǵaqqa qarsy jańa materıal ázirledik. Onyń quramy muzdy tez eritedi jáne onyń -30°C deıin ornyǵýyna jol bermeıdi. Materıaldyń tıimdiligi men artyqshylyqtaryn kórip, tanysqysy keletinderdi ınstıtýt zerthanasynda shaqyramyz», deıdi «QazjolǴZ» AQ baspasóz qyzmetiniń ókilderi.
Tájirıbelik ýchaskede synaqtan ótkennen keıin ǵylymı ınstıtýt ınvestorlardy tartýdy jáne kóktaıǵaqqa qarsy jańa quraldyń óndirisin iske qosýdy josparlap otyr.