2060 jylǵa deıin kómirtegi beıtaraptyǵyna qol jetkizý strategıasy bekitilgen
QR Premer-Mınıstri Álıhan Smaıylov pen Eýropalyq qaıta qurý jáne damý bankiniń Ortalyq Azıa boıynsha basqarýshy dırektory Jýjanna Hargıtaı Qazaqstanda 2023 jylǵa arnalǵan ınvestısıalyq jobalardy iske asyrý jónindegi josparlardy talqylady, dep habarlaıdy Almaty-akshamy.kz.
Taraptar bank sektoryn, jańa óndirýshi qýattardy engizý bóliginde energetıka salasyn damytý, sondaı-aq ınjenerlik ınfraqurylymdy, sonyń ishinde káriz-tazartý qurylystaryn jańǵyrtý máseleleri boıynsha pikir almasty.
Álıhan Smaıylov Qazaqstan EQDB-men ózara is-qımyldyń strategıalyq sıpatyn jáne banktiń qurylymdyq reformalardy júrgizýge qosqan úlesin joǵary baǵalaıtynyn atap ótti.
«Úkimet “jasyl” ekonomıka, kólik jáne logıstıka, jańartylatyn energıa kózderi men jeke bıznesti damytý salalaryndaǵy jobalardy iske asyrý boıynsha belsendi birlesken jumysqa daıyn. Biz eldik jáne óńirlik deńgeıde yntymaqtastyǵymyzdy keńeıtýge nıettimiz», — dedi ol.
Sonymen qatar Premer-Mınıstr ekonomıkalyq damý sheńberinde respýblıkada dekarbonızasıalaýǵa erekshe nazar aýdarylatynyn, osyǵan baılanysty bıylǵy jyldyń aqpan aıynda Qazaqstan Respýblıkasynyń 2060 jylǵa deıin kómirtegi beıtaraptyǵyna qol jetkizý strategıasy bekitilgenin aıtty.
Óz kezeginde Jýjanna Hargıtaı EQDB-nyń barlyq qoldanystaǵy jáne josparlanǵan jobalar boıynsha naqty nátıjelerge qol jetkizýdi maqsat etkenin rastady. Bul rette ol Banktiń ekonomıkanyń basym salalarynda jańa «jasyl» bastamalardy pysyqtaýdy jandandyrýǵa daıyn ekendigin atap ótti.