Mektep máselesi sheshilmegenine 6 jyl bolǵan
Úsh shaqyrym jerdegi úsh aýysymdy mektepke bala tasyp qınalǵan turǵyndar jańa oqý ordasynyń ortalyqtan salynýyna qarsy, dep habarlaıdy Almaty-akshamy.kz Almaty.tv-ge silteme jasap.
Alty jyl boıy aıtylyp kelgen jaıtty ákim de biledi. «Aýyl basshysy aýysa beredi, al másele áli sol qalpynda», - deıdi kópshilik.
Tutas aýyldy bylaı qoıǵanda, mektepke muqtaj aýmaqtyń ózinde 300 oqýshy bar. Kórshi otyrǵan eki úıdiń ul-qyzy eki túrli mektepke barady degen kópshilik 2017-de ýáde etilgen oqý orny qashan salynady dep narazy. Talaı tabaldyryqty tozdyrǵan turǵyndarǵa buǵan deıin bir ǵana jer jetpeıdi degen syltaý aıtylypty.
Kóptiń mektep salynsyn dep kóksegen orny – osy. 2020 jyly jekemenshikke ótip ketken 15 gektar aýmaq qazir osylaı bos jatyr. Biraq bir kezderi jergilikti jurtqa bul mańaıda mektep salynady dep ýáde berilgen, tipti jobasy jasalypty.
«Jer alǵan kezde burynǵy ákim, osy jerde mektep bolady, josparda bar degen. Ol mektepti basqa jerge salaıyn dep tur, aıtylǵan jerde telim joq dep. Biz soǵan qarsymyz. Ýáde berilgen orynǵa 1500 oryndyq mektep salyp bersin», – dedi QazSık aýylynyń turǵyny Aral Eshmahanov.
Halyqtyń qarsy bop otyrǵany – ortalyqtaǵy, jańa stadıonnyń ornyna salynatyn mektep. Jospardaǵy bilim ordasynyń bıyl qujaty rettelip, keler jyly qurylysy bastalatyn kórinedi. "Jańa mektep eski máseleni joımaıdy, odan da alys aýdanǵa suraǵanymyzdy salsyn" deıdi kópshilik.
«Aıyna 20 myń teńgege bir balaǵa jetkizýshi kólik jaldaımyz. Meniń 2 balam bar. Kóktem kezinde jetkizýshi kólikter kelispeıdi kelýge, sebebi jol nashar. Bilmeımin, qalaı tasımyz balalarymyzdy sabaqqa?», – dedi QazSık aýylynyń turǵyny Aıda Álıjanova.
Úımen arasy kemi 3 shaqyrym bolatyn jan-jaqtaǵy 3 mektepte 4600 bala oqıdy. Oryn jetpegendikten, úsh aýysymdy júıe áli bar. Al ákim el suraǵan jerdiń memleket múlki emesin aıtyp otyr.
Qysqasy, 15 gektardyń besten birin ıesinen alý úshin joba jasalyp, tıisti orynǵa joldanypty. Naqty sheshim áli shyqqan joq.
«Eger jer teliminiń ıesi memleket qoıǵan baǵaǵa kelispese, onda biz sot prosesi arqyly osy jerdi memleket tarapyna qaıtyp alýǵa áreket etemiz. Bul 15 gektar jer. Osy másele boıynsha sharalardy jasaýdy bastadyq. 3 gektar jerge 1500-1200 oryndyq mektepti salýdy josparlap otyrmyz», – dedi QazSık aýyldyq okrýginiń ákimi Baýyrjan Jumabaev.
Bul jospardyń naqty qashan júzege asatyny belgisiz. «Eń jaqyn ýaqyt – 2025 jyl» deıdi aýyl basshysy. Al el qarsy bolǵan ortalyqtaǵy mektep báribir salynady, óıtkeni úsh aýysymdyqty joıýdyń ázirge jalǵyz joly – osy.