Irına Iýnýsmetova Parıj Olımpıadasynyń lısenzıasyna qol jetkizdi
Halyqaralyq nysana kózdeý federasıasy (ISSF) búgingi kúni barlyq Álem Kýbogy kezeńderinen keıin jańartylǵan Olımpıadalyq reıtıńin jarıalady. Osy reıtıń nátıjesinde Irına Iýnýsmetova Parıj Olımpıadasynyń lısenzıasyna ıe boldy.
Ulttyq qurama sportshysy 10 metrden tapanshamen nysana kózdeý sanatynda qaıta úlestirý kezeńinde joldamaǵa ıelik etti. Bul Qazaqstannyń sporttyq atý federasıasy úshin úlken jetistik, sebebi bul 9-shy Olımpıadalyq lısenzıa.
Buǵan deıin Islam Satpaev, Konstantın Malınovskıı, Aleksandra Le, Arına Altýhova, Nıkıta Chırúkın (nysana kózdeý); Ásem Orynbaı, Edýard Eshenko jáne Marıa Dmıtrıenko (stend atý) Parıjge baratyn lısenzıaǵa ıe bolǵan edi. Osy qatarda Ásem Orynbaı men Irına Iýnýsmetovanyń lısenzıasy jeke sportshynyń ózine tıesili bolsa, qalǵandary federasıanyń kvotasy bolyp tabylady.
Jalpy alǵanda, Qazaqstannyń enshisindegi Olımpıadalyq lısenzıa sany 67-ge jetti.