Qazirgi ýaqytta komıtet 3 negizgi baǵyt boıynsha jumys júrgizip jatyr
Qazaqstannyń Eýrazıa ekonomıkalyq odaq elderimen taýar aınalymy bıylǵy bes aıda 10 mlrd dollardy qurady. Bul týraly QR Saýda jáne ıntegrasıa mınıstrliginiń alqa otyrysynda málim etildi, dep habarlaıdy Almaty-akshamy.kz QazAqparatqa silteme jasap.
QR Premer-Mınıstriniń orynbasary – Saýda jáne ıntegrasıa mınıstri Baqyt Sultanovtyń tóraǵalyǵymen QR Saýda jáne ıntegrasıa mınıstrliginiń alqa otyrysy ótti.
Alqa otyrysynda vedomstvonyń İ jartyjyldyqtaǵy jumysy qorytyndylanyp, aldaǵy kezeńge arnalǵan mindetter aıqyndaldy. Vıse-mınıstr Janel Kýshýkovanyń aıtýynsha, 2022 jyldyń bes aıynda Qazaqstannyń syrtqy saýdasynyń oń dınamıkasy baıqalady.
Bıyl qańtar-mamyrda syrtqy saýda aınalymy 51,3 mlrd dollardy qurady. Eksport ótken jyldyń sáıkes kezeńimen salystyrǵanda 59% ósip, 34,2 mlrd dollar boldy. Sondaı-aq Qazaqstannyń EAEO elderimen saýdasy oń dınamıkany kórsetýdi jalǵastyrýda.
«Qazaqstannyń EAEO boıynsha áriptesterimen taýar aınalymy 2022 jyldyń 5 aıynda 10 mlrd dollardy qurady, bul 2021 jyldyń sáıkes kezeńimen salystyrǵanda 5% kóp. EAEO elderi naryqtaryndaǵy qazaqstandyq taýarlar úshin kedergilerdi joıý boıynsha jumys jalǵasyp jatyr», — dedi Janel Kýshýkova.
Óz kezeginde QR Saýda jáne ıntegrasıa vıse-mınıstri Ásel Janasova búgingi tańda mınıstrlik 9 sıfrlyq jobany iske asyryp jatqanyn habarlady. Olardyń arasynda tólem júıesi bar áleýmettik ámıandy engizý de bar.
«Búgingi tańda «áleýmettik ámıan« pılottyq jobasyn júrgizý boıynsha jumystar múddeli memlekettik organdardyń, uıymdardyń jáne EDB-nyń qatysýymen jalǵasyp jatyr», — dedi Ásel Janasova.
Sonymen qatar Baqyt Sultanov jyl sońyna deıin múddeli organdarmen, uıymdarmen jáne EDB-men birlesip «Áleýmettik ámıandy» engizý qajettigin atap ótti.
«Jobany iske asyrý olardy paıdalaný tıimdiliginiń monıtorıńin qamtamasyz ete otyryp, halyqty áleýmettik qoldaý qarajatyn bólýdiń sıfrlyq quralyn jyldam qurýdy qamtamasyz etedi», — dedi Baqyt Sultanov.
Alqa otyrysy barysynda Saýda komıtetiniń tóraǵasy Erjan Qazanbaev ta baıandama jasady. Onyń aıtýynsha, ishki taýar aınalymy ósti. Osy jyldyń qańtar-maýsym aılarynda taýar aınalymynyń kólemi 20,6 trln teńgeni qurady. Onyń ishinde bólshek saýdada 6,1 trln teńge, kóterme saýdada 14,5 trln teńge boldy.
Qazirgi ýaqytta komıtet 3 negizgi baǵyt boıynsha jumys júrgizip jatyr:
- saýda salasyn damytý máseleleri boıynsha memlekettik saıasatty jetildirý;
- saýda ınfraqurylymyn damytý;
- azyq-túlik taýarlaryna baǵalardy turaqtandyrý máseleleri boıynsha biryńǵaı memlekettik saıasatty iske asyrýdy qamtamasyz etý.
Sonymen qatar Baqyt Sultanov Saýda komıtetiniń tóraǵasyna ASHM-nyń qant salasyn damytý boıynsha keshendi jospar ázirleý jumysyna belsendi qatysýdy tapsyrdy. Ol ımportqa táýeldilikti edáýir azaıtýǵa jáne ózin-ózi qamtamasyz etýge birtindep kóshýge baǵyttalýy kerek ekenin atap ótti.
Sondaı-aq múddeli ınvestorlardy tarta otyryp, KTO jelisi bar Ulttyq taýar ótkizý júıesin iske qosýdy jedeldetý qajet. Alqa otyrysy barysynda TRMK tóraǵasy Arman Ábenov, TQQK tóraǵasynyń orynbasary Almas Ábjapparov jáne QR SIM apparat basshysy Jánibek Nópirov mınıstrlik qyzmetiniń máseleleri boıynsha baıandama jasady.
Saýda jáne ıntegrasıa mınıstri otyrysty qorytyndylaı kele, vıse-mınıstrler men komıtet tóraǵalaryna barlyq qabyldanǵan mindettemelerdi, onyń ishinde Memleket basshysynyń jańa tapsyrmalaryn ýaqytyly jáne sapaly oryndaýdy qamtamasyz etýdi tapsyrdy.
Sondaı-aq QR Úkimetiniń keńeıtilgen otyrysynda Memleket basshysynyń synyna baılanysty Saýda komıteti basshylyǵynyń jaýapkershiligin qaraý tapsyryldy.