Kıik sany kóbeıgende óz aralarynda jemshópke, sýǵa, aýmaqqa degen báseke kúsheıedi
QR Ekologıa, geologıa jáne tabıǵı resýrstar mınıstri Serikqalı Brekeshev QR Prezıdenti Teleradıokeshininiń «Úsh suraq» baǵdarlamasyna bergen suhbatynda kıik sanyn retteý máselesi týraly aıtty, dep habarlaıdy Almaty-akshamy.kz QazAqparatqa silteme jasap.
«Kıik sany eń kóp artqan kezi ótken ǵasyrdyń senseninshi jyldary dep esepteledi. Ol kezde kıik basy 1 mln 200 myńǵa jetken bolatyn. Al qazir tóldiń ózin eseptemegende 1 mln 318 myń bas bar. Sondyqtan, biz kıik popýlásıasyn saqtaý jáne qalpyna keltirý baǵytyndaǵy jumysty oryndap qoıdyq deýge bolady», - dedi ol suhbat barysynda.
Vedomstvo basshysynyń paıymynsha, kıik sanynyń shekten tys kóp bolýy egin men jaıylymǵa ǵana emes, ózderine de zıandy.
«Kıik sany kóbeıgende óz aralarynda jemshópke, sýǵa, aýmaqqa degen báseke kúsheıedi. Bul báseke kıikterdiń aǵzasyn álsiretedi. Kıik álsirese, aýrýshańdyǵy artady. Biz ótken jyldardyń statısıkasyn qaradyq. Aýsyl, pasterellóz sıaqty aýrýlar kıikterdiń arasynda araǵa 3-5 jyl salyp qaıtalanyp otyrady. Pasterellóz derti sońǵy ret 2015 jyly kıikke qatty tıgenin bilesizder. 150 myń bas qyrylyp qalǵan bolatyn. Bul sol kezdegi kıik basynyń 30 paıyzy edi. Al qazirgideı kóbeıgen kezinde epızootıalyq jaǵdaı týyndasa, kıik sanyn retteý nemese tıimdi paıdalaný baǵytynda qajetti shara qoldanbasaq, qyrylǵan kıiktiń sany ol kezdegiden áldeqaıda kóp bolýy múmkin. Biraq máseleni áli tyńǵylyqty zerdeleý kerek. Jýyq arada tıisti sheshim shyǵaramyz dep oılaımyn», - dedi mınıstr.
Eske salsaq, Prezıdent Qasym-Jomart Toqaev Úkimettiń keńeıtilgen otyrysynda kıik popýlásıasyn retteý máselesi boıynsha Ekologıa, geologıa jáne tabıǵı resýrstar mınıstri Serikqalı Brekeshevke sógis jarıalaǵan edi.