Turǵyndardyń sanyn eskerýge múmkindik beretin ózgerister qajet.
Májilis depýtaty Mádı Elúbaev úlken qalalarǵa jaqyn ornalasqan aýyldardyń máselesin kóterip, QR İshki ister mınıstri Marat Ahmetjanovtyń atyna saýal joldady, dep habarlaıdy Almaty-akshamy.kz QazAqparatqa silteme jasap.
«Azamattardyń shalǵaıdaǵy aýyldardan qalalarǵa únemi qonys aýdarýy baıqalyp otyr. Degenmen qalanyń ózinde jyljymaıtyn múlik alý ońaıǵa emes. Sondyqtan adamdar qalaǵa jaqyn turǵan eldi mekenderge qonystanady. Bul aýyldardyń ınfraqurylymy kóp turǵynǵa arnalmaǵandyqtan, adamdar sapaly áleýmettik qyzmetter (medısına, bilim berý jáne t.b.) alý úshin qalalarda tirkeledi. Óz kezeginde, aýyl turǵyndarynyń sanyna sáıkes keletin aýyldyń ınfraqurylymyn qurý úshin qoldanystaǵy zańnama talaptary boıynsha osy eldi mekende turatyn túrǵyndar tirkelýi qajet. Tirkelmegen adamdar osy aýylda esepke alynbaıdy. Iaǵnı, mundaı aýyldardaǵy resmı tirkelgen halyq sany naqty jaǵdaıǵa sáıkes kelmeıdi, keıbir jaǵdaılarda aıyrmashylyq 5-6 esege deıin jetedi», - dedi M. Elúbaev.
Osy oraıda ol aýylda jalpy alǵanda 30-35 myń adam tursa, al sonyń tek 5-7 myńy ǵana tirkelgenin aıtty.
«Joǵaryda aıtylǵandardy eskere otyryp, bul aýyldarda turǵyndar tolyq tirkelmegen. Búginde statısıkany júrgizetin organdar aýylda turatyn halyq sany boıynsha naqty sandardy bere almaıdy. «AMANAT» partıasynyń aýmaqtardy oılastyrylǵan túrde damytý jónindegi mindetin oryndaý úshin eldi mekenderdegi turǵyndardyń naqty sanyn eskerýge múmkindik beretin ózgerister qajet. Bul turǵyda QR İshki ister mınıstrligi, QR Sıfrlyq damý, ınovasıalar jáne aeroǵarysh ónerkásibi mınıstrligi, sondaı-aq QR Strategıalyq josparlaý jáne reformalar agenttigine tıisti is-sharalardy júzege asyrý qajet. Atap aıtqanda, turǵyndardyń sany men qurylymynyń kórsetkishterin esepteý ádistemesin ózgertý kerek. Ekinshiden, ýaqytsha tirkeýdi qadaǵalaý tetikterin ázirleý, respýblıka azamattarynyń tirkelýine jáne ýaqytsha tirkelýine qatysty baqylaýdy kúsheıtý qajet», - dedi depýtat.