Densaýlyq saqtaý mınıstrliginde Japonıanyń Nagoıa ýnıversıtetiniń profesory Eıko Iamamotomen kezdesý boldy.
Osy kezdesýde eki eldiń densaýlyq saqtaý salasyndaǵy yntymaqtastyq máselesi talqylandy, dep habarlaıdy Almaty-akshamy.kz
Bul másele boıynsha Densaýlyq saqtaý mınıstri Aqmaral Álnazarova Nagoıa ýnıversıtetiniń profesory Eıko Iamamotoǵa óz usynysyn aıtty. Ol mınıstrliktiń jas dárigerler men densaýlyq saqtaý menedjerlerin daıyndaý isinde japon mamandarymen áriptestikti nyǵaıtýǵa daıyn ekenin aıtty.
«Biz Japonıamen jáne Kúnshyǵys eliniń Qazaqstandaǵy elshiligimen burynnan kele jatqan dostyq qarym-qatynasty eskere otyryp, sizdiń tájirıbeńiz ben bilimińizdi paıdalanǵymyz keledi. Jas dárigerler men densaýlyq saqtaý menedjerlerin daıarlaý isinde áriptestiktiń jańa deńgeıine shyǵýǵa daıynbyz», – dedi mınıstr.
Profesor Eıko Iamamoto densaýlyq saqtaýdyń jas kóshbasshylary baǵdarlamasynyń sheńberinde bir jyldyq oqý baǵdarlamasy týraly aıtty.
«Bul baǵdarlama Azıa elderi mınıstrliginiń qyzmetshilerine, sonyń ishinde Qazaqstanǵa arnalǵan magıstratýra mamandyǵyna arnalǵan. Ol 20 jyldan astam ýaqyt boıy jumys istep keledi. Baǵdarlama qoǵamdyq densaýlyqqa baǵyttalǵan. Tek oqytý segmenti ǵana emes, sonymen qatar Japonıanyń densaýlyq saqtaý júıesiniń qalaı jumys isteıtinin jáne pármendiligin kórý úshin aýrýhanalarǵa, gospıtáldarǵa, dárihanalarǵa jáne basqa da medısınalyq uıymdarǵa barý segmenti de bar», – dedi Iamamoto.