Qazaqstannyń boks federasıasy resmı túrde World Boxing-tiń tolyqqandy múshesi atandy, - dep habarlaıdy aqshamnews.kz QR UOK silteme jasap.
Bul týraly AQSH-tyń Kolorado-Sprıngs qalasynda ótken World Boxing halyqaralyq boks federasıasynyń Kongresinde habarlandy.
Búginde World Boxing (WB) uıymyna 55 el kirip otyr.
Kongres barysynda HOK maquldaǵan WB Jarǵysyna engizilgen ózgerister týraly pikirtalas boldy.
Sonymen qatar jarys ótkizý reglamentine engizilgen ózgerister de qabyldandy. Atap aıtqanda, týrnırler jańa salmaq dárejelerinde ótkiziletin bolady. Sondaı-aq tóreshilerdiń jekpe-jek barysyndaǵy jáne jeńimpazdardy anyqtaý kezindegi jumysyna da ózgerister engizildi.
Sondaı-aq World Boxing Olımpıadalyq komısıasynyń tóraǵasy Gennadıı Golovkın Kongres qatysýshylarynyń aldynda sóz alyp, U19 jasóspirimder arasyndaǵy alǵashqy álem chempıonatyn jáne Kongresti uıymdastyrǵany úshin US Boxing uıymyna alǵys bildirdi.
Óz sózinde ol Portýgalıada ótken Ulttyq Olımpıada komıtetteri qaýymdastyǵynyń (UOKQ) Bas Assambleıasynda ártúrli elderdiń Ulttyq Olımpıada komıtetteri jáne Olımpıada qozǵalysynyń ózge de sporttyq uıymdarymen kezdesýler ótkizgen World Boxing Olımpıadalyq komısıasynyń jetistikterin atap ótti.
Kongres barysynda Qazaqstannyń boks federasıasy Los-Andjelestegi Olımpıada oıyndaryna irikteý týrnıri retinde 2027 jylǵy boks boıynsha álem chempıonatyn ótkizýge ótinim berdi. Álemdik uıymnyń sheshimi jaqyn arada belgili bolady.