Bul týraly Eńbek jáne halyqty áleýmettik qorǵaý mınıstri Svetlana Jaqypova aıtty.
Zeınetke erte shyqqysy keletin azamattardyń eńbek ótili 25 jyldan kem bolmaýy kerek, dep habarlaıdy aqshamnews.kz
«Búgingi tańda bizdiń qoǵamda birneshe suraq talqylanyp jatyr. Bul - zeınet jasyn kútpeı, zeınetke erte shyǵý. Bul suraq analarymyz, kópbalaly analarymyz, múgedektigi bar balalardy tárbıelep otyrǵan analarymyz úshin óte mańyzdy. Bul kisiler de erte zeınetke shyǵý máselesin kóterip otyr. Sondaı-aq mınıstrliktiń aldyna zıandy jaǵdaıda jumys isteıtin azamattardy 50-55 jastan zeınetke shyǵarý máselesi de qoıylyp otyr», - dedi mınıstr.
Mınıstrdiń aıtýynsha, bul halyqaralyq deńgeıde sheshimin tapqan suraqtar.
«Mysaly, zeınet jasyna kelse de, zeınetke shyqpaı, jumysyn ári qaraı jalǵastyrǵan azamattarǵa zeınetaqysyn tólemeı, ony búdjette qaldyrý. Al zeınet jasyna jetpeı, zeınetke shyqqysy keletin azamattarǵa búdjettegi sol qarjyny tóleý qarastyrylyp otyr», - dedi Eńbekmıni.
Bul rette zeınetke erte shyqqysy keletin azamattardyń eńbek ótili 25 jyldan kem bolmaýy kerek. Iaǵnı osy ýaqyt boıy zeınet jarnalary aýdarymy bolýy qajet. Mysaly, azamat 20 jasynan bastap jumys istese jáne tıisti jarnalary ýaqytyly aýdarylyp otyrsa, onda ol 45 jasynda erte zeınetke shyǵa alady. Usynystar áli qabyldanǵan joq, muny qazir mınıstrlik tıisti organdarmen birlese qarap jatyr.