Qazaqstan boıynsha sálemdemelerdiń eń aýqymdy kólemi Almaty qalasynda. Bul týraly «Qazposhta» AQ Almaty qalalyq fılıalynyń dırektory Rústem Nurken Qoǵamdyq komýnıkasıa qyzmetinde ótken brıfıńte málimdedi, dep habarlaıdy aqshamnews.kz
Spıkerdiń aıtýynsha, Almaty - qarjylyq ortalyq bolyp sanalady, óıtkeni munda bıznes te jaqsy damyǵan. Jalpy bıyl 8 aıdyń ózinde 1,1 mıllıonǵa jýyq hat-habar, 1 mıllıonnan astam sálemdeme joldanǵan.
«Biz bıznes salasymen tyǵyz qarym-qatynasta jumys júrgizip jatyrmyz, sonyń ishinde bızneske ózimizdiń franchaızıńtik bólimshelerimizdi ashýǵa múmkindik beremiz. Qazirgi tańda 20-dan astam franchaızıń bólimshelerimiz bar, sol 20 franchaızıń 8 aıdyń tóńireginde úlken tabystarǵa jetýde. Jyl sońyna deıin 40-tyń tóńiregine jetkizýge jumystanýdamyz», — dedi «Qazposhta» AQ Almaty qalalyq fılıalynyń dırektory Rústem Nurken.
Ol sondaı-aq, jergilikti poshta iri kompanıalarmen seriktes ekenin atap ótti.
«Biz Ozon, Wildberries, Pinduoduo sekildi iri kompanıalarmen seriktespiz. Osy kompanıalarǵa tapsyrystardy berý pýnktin ashtyq: Wildberries - 7, Ozon - 3, Pinduoduo - 30. Elektrondyq komersıanyń qarqyndy damýyna baılanysty bul núktelerdi ári qaraı kóbeıtetin bolamyz», — dedi Rústem Nurken.
Almaty qalalyq poshtasy birqatar jańa jobalardy iske asyrýda. Solardyń biri sońǵy 2 aptanyń tóńireginde iske qosylǵan «úı janyndaǵy dúken» jobasy. Spıkerdiń aıtýynsha, bul árbir dúkende «Qazposhtanyń» sálemdemelerin berýge múmkindik beredi.
Jergilikti poshta fılıalynyń dırektory poshta qyzmetinde avtomattandyrylǵan robottardy paıdalaný josparlanyp otyrǵanyn atap ótti.
«Qazirgi zamanaýı tehnologıalarǵa «Qazposhta» da qalys qalyp jatqan joq. Ozyq tehnologıalardy qoldanamyz, Almaty qalasynyń syrtynda aqparattyq-logıstıkalyq ortalyq jumys jasaıdy. Ol Qazaqstan boıynsha sálemdemelerdi suryptaıdy. Sol orynda saǵatyna 10 myń sálemdemeni suryptaıtyn avtomattandyrylǵan mashınany qurýdy bastadyq, jaqynda iske qosylady. Basqarma tóraǵasynyń bastamasymen japon kompanıasy Toshido-men memorandým jasaldy, fýlfılment qyzmetterimizdi tezdetý úshin avtomattandyrylǵan robottardy jetkizý týraly kelisim bar. Sol kelisim aıasynda fýlfılment qyzmetterdi damytatyn bolamyz», — dedi fılıal dırektory.
Sondaı-aq brıfıń barysynda poshta dırektorynyń orynbasary Zabýrına Nadejda jýrnalıserdiń «osal sanattaǵy adamdarǵa jeńildik tarıfteri bar ma?» degen suraǵyna jaýap berdi.
«Iá, árıne, bizde zeınetkerler men UOS ardagerleri úshin belgili bir jeńildikter bar, oǵan qosa olar kezekten tys qyzmet ala alady. Odan bólek, korporatıvtik klıentter úshin de jeńildikter qarastyrylǵan», — dedi Zabýrına Nadejda.
Qusaıynov Berik, «Qazposhta» AQ Almaty qalasy fılıaly dırektorynyń orynbasary, almatylyqtar eń kóp paıdalanatyn TOP-3 qyzmetti atady.
«Almatylyqtar eń kóp paıdalanatyn TOP-3 qyzmet: EMS jyldam jetkizý, sálemdeme joldaý jáne arnaıy tapsyryspen hattar», — dedi Berik Qusaıynov.
Brıfıń sońynda spıkerler «Qazposhta» AQ atyn jamylyp júrgen alaıaqtardyń kóbeıgenine qatysty pikir bildirdi.
«Ortalyq apparatpen birigip, bul másele boıynsha kúresýdemiz. Ár fılıalda oqytý sektory bar, bul sektorda qyzmetkerler men tutynýshylarǵa alaıaqtarǵa aldanbaý jolyn túsindirip otyrady», — dep qorytyndylady spıkerler.
Aıta keteıik, 9 qazan — dúnıejúzilik poshta kúni. Alǵashqy poshta bólimshesi Almaty qalasynda (Vernyı) 1860 jyldyń 24 qazanynda ashylǵan.