Qonaev qalasyndaǵy 35 jastaǵy áıel gemoglobınniń óte tómen deńgeıimen aýyr jaǵdaıda qalalyq kópbeıindi aýrýhanaǵa túsken.
Shuǵyl emdeýge jatqyzǵannan keıin dárigerler jatyrdyń úlken mıomasyn anyqtap, hırýrgıalyq aralasýdy – laparotomıa men konservatıvti mıomektomıany sátti júrgizip, salmaǵy 4 kılogramm mıomany alyp tastady, dep habarlaıdy aqshamnews.kz Densaýlyq saqtaý mınıstrligine silteme jasap.
Operasıa kezinde aǵzanyń ózin saqtaı otyryp, jatyr mıomasynyń túıinderi alynyp tastalady.
«Bul dıagnozdy nemquraılylyqpen qabyldaýǵa bolmaıdy, óıtkeni jatyr mıomasy eń kóp taralǵan gınekologıalyq aýrýlardyń biri bolyp tabylady jáne úlken mólsherge jetýi múmkin. Sonymen qatar, klınıkalyq kórinis pasıenttiń jasyna, aýrýdyń uzaqtyǵyna, isiktiń ornalasýy men mólsherine baılanysty jáne jatyrdan qan ketý, anemıa, sozylmaly aýyrsyný sındromy, kórshi aǵzalardyń qysylý sındromymen kórinýi múmkin, bul kóbinese jatyr mıomasynyń kóleminiń edáýir ulǵaıýy kezinde kezdesedi», - deıdi pasıenttiń emdeýshi dárigeri Ábdýálıeva Raýshan Bekjanqyzy.
Áıel qazirgi ýaqytta úıinde, dárigerlerge alǵysyn bildirýde.
Jatyrdyń qabyný aýrýlary, gormonaldy buzylýlar, aborttar, etekkirdiń kesh bastalýy, artyq salmaq, durys tamaqtanbaý, júrek-qan tamyrlary patologıasy beıimdilik faktorlary bolýy múmkin ekenin aıta ketken jón.
Kóbinese aýrý baıqalmaýy múmkin. Osyǵan baılanysty dárigerler mezgil-mezgil tekserýden ótý, jaǵyndylardy, sonyń ishinde sıtologıany tapsyrý, sondaı-aq últradybystyq dıagnostıkadan ótý qajettiligin eske salady. Sondaı-aq, dárigerler jylyna keminde bir ret jambas, sút bezderiniń, qalqansha beziniń últradybystyq zertteýin jasap, gınekologqa qaralýdy usynady.
Emdeýge jatqyzý, operasıa jáne emdeý mindetti áleýmettik medısınalyq saqtandyrý qarajatynyń esebinen júrgizildi