Qazaqstanda nekege turýdyń tómendeýiniń basqa faktorlary áleýmettik-ekonomıkalyq jáne demografıalyq jaǵdaı bolýy múmkin.
Sońǵy bes jylda Qazaqstandaǵy nekelesý dınamıkasy shamaly tómendedi. 2017 jyly elimizde 141 791 neke qıylsa, eń tómengi kórsetkish 2020 jyly – 128 839 neke bolyp tirkeldi, dep habarlaıdy Almaty-akshamy.kz.
Bul zertteý Qazaqstandyq qoǵamdyq damý ınstıtýtynyń sarapshylary ázirlegen «Qazaqstandyq otbasylar-2022» ulttyq baıandamasynda jarıalanǵan. Zertteýde Qazaqstannyń 17 óńiri jáne 1200 adam qamtylǵan.
«Óńirlik bóliniste sońǵy bes jylda neke qıý deńgeıiniń tómendeýi barlyq óńirde saqtalyp keledi. Alaıda, halyqtyń nekelesýiniń jalpy tómendeýine qaramastan, 2018, 2019, 2020 jáne 2021 jyldary Almaty qalasynda Qazaqstan boıynsha nekelesýdiń joǵary deńgeıi saqtaldy. Odan keıingi orynda Almaty, Túrkistan oblystary men Astana qalasy tur», - dep jazylǵan ulttyq baıandamada.
Atalǵan óńirlerde halyqtyń neke qıý kórsetkishi salystyrmaly túrde joǵary bolyp qala beredi. Osylaısha, jyl saıyn tirkelgen nekeniń jalpy statısıkasy bul kórsetkishtiń birtindep tómendegenin kórsetedi, biraq birneshe óńirde nekelesý kórsetkishi áli de joǵary.
2020 jylǵy nekelesý kórsetkishiniń eń tómengi deńgeıi COVID-19 pandemıasynyń qoǵamdyq ómirge, halyqtyń nekege turýyna áser etýimen túsindiriledi. Bul jaǵdaıda halyqtyń nekege turý kórsetkishiniń 7,6%-ǵa tómendeýi lokdaýn, memlekettik qyzmet kórsetýdiń baıaýlaýy jáne úılený toılaryn ótkizýge shekteýler sıaqty faktorlarǵa baılanysty.
«Qazaqstanda nekege turýdyń tómendeýiniń basqa faktorlary áleýmettik-ekonomıkalyq jáne demografıalyq jaǵdaı bolýy múmkin. Aýyldyq jerlerde jumyspen qamtýdyń tómen deńgeıi jáne halyq tabysynyń tómendigi sıaqty problemalar áli de ózekti ekenin atap ótken jón. Búgingi tańda Qazaqstanda 500 adam jáne odan da kóp adam turatyn 6,5 myńǵa jýyq aýyl bar, olardyń kópshiliginde mektepter, feldsherlik qyzmetter nemese sapaly, qaýipsiz avtokólik joldary joq. Osynyń bári ómirlik jaǵdaılaryna qanaǵattanbaýshylyqty týdyrady, sonyń saldarynan jastardyń jumys kóbirek usynylatyn qalalarǵa kóshýine ákeledi», - deıdi zertteý.
Aıta keteıik, Qazaqstandyq otbasylar-2022» baıandamasynyń tolyq nusqasy myna siltemede qoljetimdi.