QR Premer-Mınıstri Álıhan Smaıylov Úkimet otyrysy barysynda jem-shóppen qamtamasyz etý jáne egin oraǵy naýqanyna daıyndyq týraly tapsyrmalar berdi.
Aýyl sharýashylyǵy mınıstri Erbol Qarashókeev aýyl sharýashylyǵy janýarlaryn azyqpen qamtamasyz etý jumystary aıasynda jem-shóp daqyldarynyń egis alańdary 448,1 myń gektarǵa ulǵaıtylǵanyn habarlady, jem-shóp satyp alýdy sýbsıdıalaýǵa qarajat bólindi, jem-shóp astyǵyn satyp alý úshin Azyq-túlik korporasıasynyń jarǵylyq kapıtaly ulǵaıtyldy, 1 qazanǵa deıin QR aýmaǵynan bıdaı shyǵarýǵa kvotalardyń qoldanysy uzartyldy, dep habarlaıdy Almaty-akshamy.kz Primeminister.kz-ke silteme jasap.
Budan basqa, árbir óńir boıynsha júıeli sharalardy qamtıtyn Azyq óndirisi salasyn damytý jónindegi 2022-2025 jyldarǵa arnalǵan jol kartasy ázirlenip, bekitildi.
Sondaı-aq mınıstr respýblıkanyń barlyq óńirinde jappaı egin jınaý bastalǵanyn aıtty. Búginde barlyǵy 2,2 mln ga dándi jáne dándi-burshaqty daqyldar (13,9%) jınaldy, ortasha ónimdilik 14,6 s/ga jaǵdaıynda 3,3 mln tonna astyq bastyryldy. Bıyl aýyl sharýashylyǵy daqyldary jınalǵan alań 23,4 mln gektardy qurady, bul 2021 jylmen salystyrǵanda 387,1 myń gektarǵa artyq.
Aýyspaly qaldyqtardy eskere otyryp, jalpy astyq jınaýdan kútiletin kólem respýblıkanyń ishki qajettiligin tolyq qamtamasyz etý, sondaı-aq astyqtyń belgili bir kólemin eksportqa ótkizý jáne dástúrli naryqtardaǵy saýda pozısıalaryn saqtaý úshin jetkilikti.
Energetıka mınıstri Bolat Aqsholaqovtyń málimetinshe, bıyl kúzgi dala jumystaryna 423,5 myń tonna dızel otyny bólindi. Shildede 106,6 myń tonna tıeldi, tamyzda 148,2 myń tonnaǵa tólenip, 87,4 myń tonna tıeldi.
Aýyl sharýashylyǵy taýaryn óndirýshilerge munaı óńdeý zaýyttarynan dızel otynyn jetkizý basym negizde júzege asyrylady. Olardyń baǵalary óńirge baılanysty bólshek saýda baǵasynan 15-25% tómen.
Baıandamashylardy tyńdap bolǵan Premer-Mınıstr jalpy bıyl mal azyǵyn daıyndaý jumystary úshin aýa raıynyń qolaıly bolyp turǵanyn aıtty. Degenmen Mańǵystaý jáne Atyraý oblystary grafıkten keshigip keledi.
«Bul óńirler jumys qarqynyn kúsheıtýi kerek», —dedi Álıhan Smaıylov.
Premer-Mınıstr Úkimettiń egin oraǵyn qarjylaı jáne materıaldyq-tehnıkalyq qamtamasyz etý boıynsha barlyq qajetti sharalardy qabyldaǵanyn aıtyp ótti.
«Bıylǵy boljam boıynsha, astyqtyń túsimi ortasha jyldyq kórsetkishten joǵary bolýy kerek. Osyǵan baılanysty Aýyl sharýashylyǵy mınıstrligi men ákimdikterdiń basty mindeti – egin oraǵyn ýaqytynda jáne sapaly ótkizý», — dedi Álıhan Smaıylov. Sondaı-aq Úkimet basshysy elevatorlardyń astyqty qabyldaýǵa jáne saqtaýǵa daıyn bolýyn qamtamasyz etý kerektigin aıtty.
Sonymen qatar Aýyl sharýashylyǵy, Indýstrıa jáne ınfraqurylymdyq damý mınıstrlikteri men «Qazaqstan temir joly» ulttyq kompanıasyna óńir ákimdikterimen birlesip, vagondarmen qamtamasyz etý jáne logıstıka máselesin sheshý jumystaryn júrgizý tapsyryldy.
Úkimet basshysy Aýyl sharýashylyǵy mınıstrligine Azyq-túlik kelisimshart korporasıasymen birlesip, qys mezgiline jem-shóp qoryn ýaqytyly jasaqtaý sharalaryn qabyldaý ári olardyń baǵasynyń turaqty bolýyn qamtamasyz etýdi tapsyrdy.
Álıhan Smaıylov dızel otynymen qamtamasyz etý máselelerine erekshe nazar aýdardy. Osy jumys aıasynda Premer-Mınıstrdiń birinshi orynbasary Roman Sklárǵa janar-jaǵarmaıdyń baǵalaryn baqylaý jáne tapshylyǵyna jol bermeý jónindegi turaqty jumys isteıtin komısıa qurý tapsyryldy.
«Ulttyq ekonomıka mınıstrligi Básekelestikti qorǵaý jáne damytý agenttigimen jáne ákimdiktermen birlesip, baǵa negizsiz kóterilgen jaǵdaıda tıisti den qoıý sharalaryn qabyldaýy kerek. Indýstrıa jáne ınfraqurylymdyq damý mınıstrligi, “QazMunaıGaz” jáne QTJ kompanıalary Munaı óńdeý zaýyttarynan munaı ónimderin ýaqytyly jiberýdi qamtamasyz etý boıynsha sharalar qabyldaýy qajet», — dedi Álıhan Smaıylov.
Sonymen qatar Sıfrlyq damý, ınnofasıalar jáne aeroǵarysh ónerkásibi jáne Energetıka mınıstrlikterine dızel otynyn satýdyń táýliktik lımıtterin baqylaý jónindegi aqparattyq júıeni engizýdi jedeldetý jáne Energetıka mınıstrligine óńir ákimdikterimen birlesip, egin oraǵy kezinde sharýalardy janar-jaǵarmaımen ýaqytyly qamtamasyz etý máselesin turaqty baqylaýda ustaý tapsyryldy.