Almatyda №7 qalalyq aýrýhananyń qabyldaý bólimshesiniń meńgerýshisi sanıtarǵa qol kótergen.
Bul týraly aqparat áleýmettik jelide tarady. 19 jastaǵy sanıtar Nurjan Ohanov osyǵan deıin de meńgerýshiniń uryp-soqqanyn aıtqan. Jábirlenýshiniń áriptesteri de muny rastady, dep habarlaıdy Almaty-akshamy.kz Egemen.kz-ke silteme jasap.
«Qatty soqqyǵa jyqty. Qabyldaý bóliminde uryp-soǵypty. Sanıtar basshymyzdan qorqyp, qorǵanǵan da joq», - deıdi №7 aýrýhana qyzmetkerleri.
Aqparatqa sáıkes, Nurjan Ohanov saraptamadan ótken. Qazirgi ýaqytta densaýlyǵyna baılanysty demalysta. Sanıtardyń ata-anasy polısıaǵa aryz jazǵan.
Belgili bolǵandaı, bas dáriger 19 jastaǵy sanıtardy buǵan deıin de soqqyǵa jyqqan, biraq keıin is jabylyp qalǵan. №7 aýrýhana qyzmetkerleriniń aıtýynsha, basshy sanıtarlardy jıi urady.
«Psıhologıalyq qysym jasaıdy, aıqaılaıdy. Biz naýqastarmen jumys isteımiz, jumysymyz aýyr. Eń las jumysty sanıtarlar jasaıdy jáne olar basshynyń qysymyna shydaıdy. Sonymen qatar, basqa aýrýhanalardyń barlyǵy bonýs alady, al biz shette qalamyz. Ótken merekelerdiń bárinde biz syıaqy almaımyz, kómektesińizder, jaǵdaıymyzdy mınıstrlikke jetkizińizder», - dedi aýrýhana qyzmetkerleri.
Olar basshylyqtyń qýdalaýynan qorqatyndyqtan, aty-jónin, tegin kórsetpeýdi ótindi. Olardyń aıtýynsha, buǵan deıin jýrnalıserge ashyq shaǵymdanǵan qyzmetkerlerdiń biri jumystan qýylǵan.
Aqparatqa sáıkes, taǵy bir oqıǵadan keıin soqqyǵa jyǵylǵan jigittiń áriptesteri jedel járdem bóliminiń bastyǵyna qatysty qyzmettik tergeý júrgizilý úshin qol jınap jatyr.
Degenmen, aýrýhana ákimshiligi munyń bárin joqqa shyǵaryp otyr. Sebebi, is júzinde oqıǵa kýágerleri joq. Sondaı-aq bul máselege qatysty eshkim aýrýhana basshylyǵyna shaǵym bildirmegen. Aýrýhana basshylyǵy oqıǵanyń mán-jaıy anyqtalǵannan keıin, tıisti sharalar qabyldanatynyn jetkizdi.
«№7 qalalyq klınıkalyq aýrýhananyń pasıentterdi qoldaý jáne ishki aýdıt qyzmetine, qabyldaý bóliminiń qyzmetkerleri arasyndaǵy janjal týraly dabyl tústi. Mán-jaıdy anyqtaý úshin bólimsheniń medısına qyzmetkerlerimen, onyń ishinde bólimshe meńgerýshisimen, sanıtarmen áńgime júrgizildi. İshki aýdıt qyzmetine jumys kúni ishinde qabyldaý bólimindegi jumys prosesin baqylaý tapsyryldy», dedi Almaty qalalyq qoǵamdyq densaýlyq saqtaý basqarmasy.