Olarǵa aı saıynǵy jalaqysy úsh ese tólenetin bolady.
Qorǵanys mınıstrligi Qazaqstan bitimgerleriniń Golan jotalaryna attanýǵa daıyndalyp jatqanyn aıtty, dep habarlaıdy Almaty-akshamy.kz
Qazir 19 áskerı qyzmetshi tórt memlekette BUU-nyń bitimgerlik mısıasyn atqaryp keledi.
Birikken Ulttar Uıymynyń Nú-Iorktegi shtab-páterinde Golan jotalaryndaǵy bólingen jerlerdi «BUU-nyń baqylaý kúshteri» (SONNR) mısıasyna bitimgerlik kontıngentti jiberý úshin Qazaqstan Respýblıkasynyń Úkimeti men Birikken Ulttar Uıymy arasynda ózara túsinistik týraly memorandýmǵa qol qoıyldy.
Qorǵanys mınıstrliginiń habaralýynsha, alǵash ret Birikken Ulttar Uıymy Qazaqstanǵa bitimgerlik mısıany óz betinshe jiberýge jáne oryndaýǵa mandat berdi. Qazaqstandyq kontıngenttiń quramynda 139 áskerı qyzmetshi bar. Qazaqstan bitimgerleri BUU mısıasynyń mandatyna sáıkes, qarsylas taraptar arasynda atysty toqtatý rejımin saqtaý mindetterin oryndaıtyn bolady.
Mısıany oryndaý úshin qazaqstandyq áskerı qyzmetshiler BUU-nyń talaptary men standarttaryna sáıkes, muqıat irikteýden jáne daıarlyqtan ótti. Keshendi alty aılyq daıyndyq Qorǵanys mınıstrliginiń Bitimgerlik operasıalar ortalyǵynda uıymdastyryldy. Áskerı qyzmetshilerdi oqytýǵa bitimgerlik operasıalar, mınadan tazartý jáne áskerı medısına ortalyqtarynyń nusqaýshylar quramy qatysty. Áskerı qyzmetshiler aǵylshyn tilin, kúsh qoldaný erejelerin, halyqaralyq jáne gýmanıtarlyq quqyq normalaryn oqydy. Bitimgerlik bazany qorǵaý, tosqaýyl beketterin uıymdastyrý, patrúldeý, jarylǵysh qurylǵylardy zalalsyzdandyrý, kómek kórsetý jáne evakýasıalaý boıynsha mindetter is júzinde pysyqtaldy, – delingen habarlamada.
Praktıkalyq daǵdylardy jáne kontıngent shtabynyń ofıserlerimen jedel úılesimdilikti arttyrý úshin jedel-taktıkalyq deńgeıde áskerı sheshimder qabyldaý boıynsha sabaqtar ótkizildi. Sarapshylardyń baǵalaýy boıynsha, kontıngent jeke quramy joǵary daıyndyq deńgeıin, myqty motıvasıa kórsetken.
Qorǵanys mınıstrligi mısıany BUU-nyń standarttaryna sáıkes qarý-jaraq pen áskerı tehnıkanyń zamanaýı úlgilerimen jan-jaqty qamtamasyz etý jóninde aýqymdy is-sharalar keshenin iske asyrdy.
Kontıngentte jaýyngerlik modýldermen jabdyqtalǵan brondalǵan dóńgelekti mashınalar, sondaı-aq kúndelikti tirshilikke qajetti jabdyqtar bar. Olardy qamtamasyz etýge kamazdar, jol talǵamaıtyn avtomobılder jáne ınjenerlik múlik bar. Jaralylardy evakýasıalaýǵa berilgen mashınalardyń biri ottegi apparatymen, defıbrıllátormen, dári-dármektermen jáne basqa da medısınalyq jabdyqtarmen jabdyqtalǵan.
«Mısıadan ótý kezinde bitimgerlik kontıngentiniń áskerı qyzmetshilerine aı saıynǵy jalaqysy úsh ese tólenetin bolady. Budan ózge, BUU búdjetinen olar aı saıyn 1448 dollardan asa qarajat alatyn bolady. Mısıada qyzmet aıaqtalǵannan keıin áskerı qyzmetshiler shıpajaılarda emdele alady jáne negizgi demalysqa jyl saıyn qosymsha 14 táýlik qosylady. Tutastaı alǵanda, Qazaqstannyń Qarýly kúshteri bitimgerlik mısıalarǵa áskerı baqylaýshylar men shtab ofıserleri retinde jekelegen áskerı qyzmetshilerdi de, sondaı-aq jaıaý ásker, medısınalyq, barlaý, ınjenerlik sıaqty neǵurlym talap etiletin mamandandyrylǵan bólimshelerdi de jiberýge daıyn», – delingen habarlamada.
16 jyl ishinde 600-den astam qazaqstandyq áskerı qyzmetshi BUU-nyń Azıa, Taıaý Shyǵys jáne Afrıka elderindegi 7 bitimgerlik mısıasyna qatysty. Qazir 19 qazaqstandyq áskerı qyzmetshi BUU-nyń Lıvan Respýblıkasyndaǵy, Batys Saharadaǵy, Kongo Demokratıalyq Respýblıkasyndaǵy jáne Ortalyq Afrıka Respýblıkasyndaǵy bitimgerlik mısıalarynyń quramynda qyzmet etip keledi.