Berlınde sadaq atýdan álem chempıonatynyń jalaýy kóterildi.
Baıraqty básekege Qazaqstan ulttyq quramasy qatysyp jatyr. Germanıa astanasyna dúnıejúziniń 80 elinen 600-ge jýyq sportshy jınalǵan, dep habarlaıdy Almaty-akshamy.kz 24.kz-ke silteme jasap.
Elimizdiń namysyn 12 mergenimiz qorǵaıdy. Olar jarystyń 2 túri boıynsha saıysqa túspek. Sadaq atýdan álem chempıonaty 2 jylda bir ret ótedi. Bıyl halyqaralyq saıys Germanıada uıymdystyrylyp otyr. Berlınge ár eldiń eń úzdik sportshylary jınalǵan. Olardyń arasynda almatylyq Vıktorıa Lán bar. Jerlesimiz sporttyń bul túrimen 11 jyldan beri aınalysyp keledi. Ulttyq qurama sheńberinde iri halyqaralyq jarystarǵa talaı márte qatysqan. Germanıada da jeńis tuǵyryna kórinýdi maqsat etedi.
Vıktorıa Lán, sadaq atýdan Qazaqstan quramasynyń múshesi: - Alǵashqy irikteýde 360 upaıdyń 350-in jınadym. Biraq ekinshi kezeńde aýa raıy buzylyp, jaqsy óner kórsetýime birshama kedergi boldy. Jeńiske degen qulshynys zor. Árıne únemi jeńip otyrǵyń keledi.
Vıktorıa Lánmen birge halyqaralyq saıysqa 12 sportshymyz qatysyp jatyr. Olardyń arasynda tájırbesi mol sheberlermen qatar jas talanttar da bar.
Aqbaráli Qarabaev, sadaq atýdan qazaqstan quramasynyń múshesi: - Men bizdiń komandamyzdyń ishindegi eń úlkenimin. Sporttyń bul túrimen 2005-shi jyldan beri shuǵyldanamyn. Bıyl 18 jyl bolady. Óte kúrdeli sport. Tehnıkalyq, psıhologıalyq jáne fızıkalyq turǵydan ózindik erekshelikteri kóp. Jarysqa Taldyqorǵanda kún ystyqta daıyndalǵan edik mynda aýa raıy ózgeshe bolyp tur.
Berlınde jarysqa qatysýshylar qolaısyz aýa raıyna tap boldy. Kún buzylyp, jaýyn jaýyp, jel soǵýda. Jarysta básekelestik óte joǵary. Jalpy sadaq atýdan álemde Ońtústik Koreıa, AQSH, Italıa, Nıderland mergenderi eń myqty sanalady. Biraq jeńip shyǵýǵa múmkindik mol deıdi quramamyzdyń bas bapkeri.
Baýyrjan Joldybaev, Qazaqstan quramasynyń jattyqtyrýshysy: - Jalpy daıyndyq jaqsy boldy, biraq aýa raıyna qatysty kishkene balalar durys ózin jaqsy nátıjeler kórtesete almady. Endi kelesi kúnge jaqsylap daıyndalyp, komandalyq esepte jaqsy ótkizemiz dep oılaımyz. Bul sadaq atýda kópnese koreılikter, Eýropa elderi jaqsy atady. Endi bizdiń komanda áli jas bolǵandyqtan jáımen jáımen jylsaıyn, jarys saıyn jaqsy nátıjelerge jetip jatyr. Endi jaqsy úmittemiz.
Berlındegi halyqaralyq saıys osy aptanyń sońyna deıin jalǵasady. Úzdikterdiń úzdigi Parıjdegi Olımpıada oıyndaryna joldama alady.