Qazaqstan beıbit jáne teńgerimdi syrtqy saıasatty qatań ustanyp keledi. Bul týraly Parlament palatalarynyń birlesken otyrysynda Qazaqstan halqyna Joldaýyn jarıalap jatqan Memleket basshysy Qasym-Jomart Toqaev aıtty.
«Qazaqstan beıbit jáne teńgerimdi syrtqy saıasatty qatań ustanyp keledi. Elimizdiń egemendigi men táýelsizdigin nyǵaıtý, sheteldegi azamattarymyzdyń quqyqtaryn qorǵaý, ulttyq múddelerimizdi ilgeriletý, ekonomıkaǵa ınvestısıa tartý – dıplomattarymyzdyń basty mindeti. Qazaqstan Birikken Ulttar Uıymynyń Jarǵysyn qatań ustana otyryp, kóp jaqty yntymaqtastyq ornatýǵa qashanda daıyn ekenin pash etip keledi. Elimiz halyqaralyq qaýipsizdik jáne turaqtylyq máselelerin sheshýge belsendi atsalysady», - dedi Memleket basshysy.
Qasym-Jomart Toqaev Qazaqstan Birikken Ulttar Uıymy men basqa da halyqaralyq uıymdardyń terorızmge, ekstremızmge, zańsyz kóshi-qonǵa, klımattyń ózgerýine jáne ózge de qaýip-qaterlerge qarsy kúresý jolyndaǵy talpynystaryn quptaıtyndyǵyn aıtty.
«Sondaı-aq Birikken Ulttar Uıymynyń bitimgerlik qyzmetin, qarýsyzdanýǵa qatysty bastamalaryn barynsha qoldaımyz, qarýly qaqtyǵystardy dıplomatıalyq jolmen sheshý qajet dep sanaımyz. Astanada Qazaqstanyń tóraǵalyǵymen Azıadaǵy ózara is-qımyl jáne senim sharalary jónindegi keńeske, Táýelsiz Memleketter Dostastyǵyna, Shanhaı yntymaqtastyq uıymyna, Túrki memleketteri uıymyna múshe elder basshylarynyń samıtteri sıaqty birqatar mańyzdy halyqaralyq is-shara ótti. Bizge qoldaý kórsetkeni úshin odaqtastarymyz ben seriktesterimizge shynaıy rızashylyǵymyzdy bildiremiz», - dedi Prezıdent.