Memleket basshysy Qasym-Jomart Toqaevtyń búgingi bastamalary onyń buǵan deıingi joldaýlarynan jáne saılaý aldyndaǵy baǵdarlamasynan bastaý alǵan reformalardy odan ári damytýǵa arnaldy, dep jazdy telegram kanalyna Memlekettik keńesshi Erlan Qarın.
Memleket basshysy óz sózinde azamattardyń turmysyn jaqsartýdy kózdeıtin júıeli ekonomıkalyq ózgeristerge basa nazar aýdardy. Prezıdent atap ótken barlyq toǵyz basymdyq memlekettik saıasatty dál osy mindetti oryndaýǵa jumyldyrady.
Joldaýda júzge jýyq túrli bastamalar, ustynystar jáne tapsyrmalar bar. Mysaly, salyq júıesin muqıat oılastyra otyryp qaıta júkteý, shaǵyn jáne orta bıznesti qoldaýǵa arnalǵan sharalar toptamasyn ońtaılandyrý, aýyl sharýashylyǵy ónerkásibi úshin qoljetimdi nesıe berý, ádil ári tıimdi tarıf saıasatyn júrgizý, kólik ınfraqurylymyn jańǵyrtý, bilikti mamanda daıarlaý, jasandy ıntellektini damytý jáne jappaı sıfrlandyrý, azamattardyń qaýipsizdigin jan-jaqty qamtamsyz etý sıaqty basymdyqtardy aıryqsha atap óteýge bolady.
Prezıdent qoǵamda bir jyl boıy talqylanyp jatqan Atom elektr stansasyn salý máselesine qatysty referendýmdy ótkizý kúnin belgiledi. Bul referendým – «Halyq únine qulaq asatyn memleket» tujyrymdamasynyń jáne Ádiletti Qazaqstan ıdeıasynyń júzege asyrylyp jatqanynyń taǵy bir aıqyn dáleli.
Memleket basshysy halyqty alańdatyp otyrǵan birqatar ózekti máselege arnaıy toqtaldy. Onyń ishinde ınternet-alaıaqtyq, jol apattary, áskerdegi tártip, narkobızneske qarsy kúres, medısınalyq saqtandyrý júıesiniń kemshiligi, pedagogıkalyq jáne medısınalyq kadrlardyń tapshylyǵy, shaǵyn jáne orta bıznes salasyn shekten tys memlekettik baqylaý, aýyl sharýashylyǵy statısıkasyn burmalaý sıaqty túıtkilderi bar.
Joldaýdaǵy kóptegen áleýmettik-ekonomıkalyq bastamalar Memleket basshysy Ulttyq quryltaıdyń otyrystarynda aıtqan ıdeologıalyq tujyrymdardyń is júzinde júzege asyrylýynyń kórinisi bolǵanyn atap ótken jón.
Prezıdent Joldaýyn jarıalaýǵa arnalǵan jıynǵa depýtattar, mınıstrler jáne ákimder ǵana emes, túrli salada qajyrly eńbegimen daralanǵan jumysshylar, sondaı-aq Ulttyq quryltaıdyń jáne aımaqtyq qoǵamdyq keńesterdiń músheleri qatysty. Bul tájirıbe jańa saıası dástúrge aınalyp keledi.
Jalpy, Joldaý kóptegen kúndelikti mindetterdi sheshý jáne eldi damytýdyń strategıalyq maqsattaryna jetý joldaryna arnaldy.