Májilistiń jalpy otyrysynda «Qazaqstan Úkimeti men Ázirbaıjan Úkimeti arasyndaǵy Ósimdikter karantıni jáne olardy qorǵaý salasyndaǵy yntymaqtastyq týraly kelisimdi ratıfıkasıalaý týraly» zań jobasy maquldandy, dep habarlaıdy QazAqparat tilshisi.
«2010 jylǵy 29 sáýirden bastap Qazaqstan Halyqaralyq ósimdikter karantıni jáne olardy qorǵaý jónindegi konvensıanyń (HÓKQK) múshesi sanalady. Qazaqstan Respýblıkasynyń qabyldanǵan halyqaralyq mindettemeleri fıtosanıtarıalyq is-sharalar boıynsha halyqaralyq standarttardyń saqtalýyn jáne qoldanylýyn kózdeıdi. Osy talaptardy saqtaý eki el aýmaǵynda tıisti fıtosanıtarıalyq jaǵdaıdy qamtamasyz etedi», - dedi QR Aýyl sharýashylyǵy mınıstri Erbol Qarashókeev.
Kelisimdi ratıfıkasıalaý boıynsha zań jobasyn qabyldaý mynalardy qamtamasyz etedi:
- karantınge jatqyzylǵan ónimniń ornyn aýystyrý kezinde elderdiń fıtosanıtarıalyq qaýipsizdigin qamtamasyz etý maqsatynda odan ári yntymaqtastyqty damytý;
- eki el aýmaǵynyń fıtosanıtarıalyq jaı-kúıi týraly ózara habardar etý;
- zertteý jáne dıagnostıkalaý tájirıbesimen almasý bóliginde ósimdikter karantıni jónindegi ǵylymı uıymdar arasyndaǵy yntymaqtastyqty júzege asyrý.
«Qazirgi kezde Qazaqstannan Ázirbaıjanǵa ósimdik sharýashylyǵy ónimderi eksportynyń jalpy kólemi shamamen 200 myń tonnany qurap otyr. Onyń ishinde negizgi kólem dándi daqyldar (bıdaı, arpa, suly) bolsa, sondaı-aq eksportqa shyǵarylatyn ónimniń biraz bóligi kúrish pen burshaq daqyldarynan turady. Óz kezeginde Ázirbaıjannan Qazaqstan aýmaǵyna jylyna shamamen 14,5 myń tonna jemis-kókónis ónimderi keledi. Ázirbaıjannan keletin ımport negizinen alma, almurt, anar, júzim, jańǵaq jáne sıtrýs jemisteri túrlerinen turady», - dedi mınıstr.