Bakýde Qazaqstan men Ázirbaıjannyń ondaǵan iri kompanıalaryn basyn qosqan aýyl sharýashylyǵy forýmy ótti.
Oǵan qatysqan Azyq-túlik kelisimshart korporasıasynyń Basqarma tóraǵasy Asylhan Djývashev kompanıanyń qyzmeti jáne onyń astyq termınaldarynyń múmkindikteri týraly aıtyp berdi. Ol sondaı-aq Ázirbaıjanǵa iri kólemde bıdaı jetkizýge daıyn ekenin atap ótti, dep habarlaıdy aqshamnews.kz Aýyl sharýashalyǵy mınıstrligine silteme jasap.
Dándi daqyldar men júgerini qabyldap-tıeý jáne saqtaý «Aq Bıdaı-Termınal» AQ arqyly júzege asyrylady. «Azyq-túlik kelisimshart korporasıasy» UK jalǵyz aksıoneri bolyp tabylatyn kompanıa Qazaqstanda, Ázirbaıjanda jáne Iranda astyq termınaldary júıesin basqarady. Bul Aqtaý portyndaǵy termınaldyń ózi (Qazaqstan), Baký astyq termınaly (Ázirbaıjan) jáne Amırabad Greın Kısh termınaly (Iran).
Asylhan Djývashev astyqty saqtaý men ótkizýdiń tabysty jumys isteıtin júıesi Ázirbaıjanǵa astyq jetkizilimin tıimdi júzege asyrýǵa múmkindik beretinin atap ótti.
Atap aıtqanda, Govsana portynda ornalasqan Baký astyq termınalynyń astyqty qabyldaý, tıeý boıynsha óndiristik qýaty jylyna 600 myń tonnaǵa jýyq, al dıirmen kesheni jyl saıyn 50 myń tonnaǵa deıin ónimdi qaıta óńdeýge qabiletti. Termınal táýlik boıy jumys isteıdi jáne qyzmetterdiń joǵary sapasyna kepildik beretin tehnologıalyq prosesti basqarýdyń avtomattandyrylǵan júıesimen jabdyqtalǵan.
«Kezinde Qazaqstan Ázirbaıjanǵa 1 mln tonnadan astam astyq jóneltip kelgen. Qazirgi ýaqytta biz Ázerbaıjan naryǵynda qazaqstandyq bıdaımen básekege qabiletti bolý úshin burynǵy pozısıalardy qaıtarý tetikterin pysyqtap jatyrmyz», — dep sózin qorytyndylady Azyq-túlik korporasıasynyń basshysy.