Densaýlyq saqtaý mınıstri Aqmaral Álnazarova qazaqstandyq farmasevtıkalyq kompanıalardyń ókilderimen jáne negizgi dıstrıbútorlarmen 2025 jylǵa arnalǵan dári-dármekter men medısınalyq buıymdardy satyp alý máseleleri boıynsha keńes ótkizdi.
Vedomstvo basshysy densaýlyq saqtaý shyǵystary eldiń áleýmettik-ekonomıkalyq saıasatynyń negizgi kórsetkishi bolyp tabylatynyn atap ótti, dep habarlaıdy aqshamnews.kz DSM-ne silteme jasap.
”Memleket barlyq azamattar úshin medısınalyq kómek pen dári-dármektiń qoljetimdiligin qamtamasyz etýge umtylady. Satyp alý naýqanyn bastamas buryn, óndirýshi belgilegen dári-dármek baǵasy qolaıly jáne qoljetimdi ekenine kóz jetkizý mańyzdy. Bul rette jergilikti dıstrıbútorlardyń ústeme baǵasy regressıvti ústeme shekterde qalýy tıis", - dep atap ótti Aqmaral Álnazarova.
"SQ-Farmasıa" JSHS derekteri boıynsha Biryńǵaı dıstrıbútor satyp alýdy uzaq merzimdi sharttar, tikeleı kelisimsharttar, halyqaralyq uıymdar men tenderler arqyly júzege asyrady. Tender jáne otandyq óndirýshilermen uzaq merzimdi sharttar boıynsha satyp alý úlesi 88%-dy quraıdy.
Konkýrstyq rásimderdiń qorytyndysy boıynsha ótken jyly shamamen 21.5 mlrd. teńge únemdeldi, aǵymdaǵy jyly únemdeý somasy 50 mlrd.teńgege deıin ulǵaıtyldy. Degenmen, generıalyq nemese bıouqsas preparattardyń baǵasy bastapqy dári-dármekterdiń qunynan asatyn jaǵdaılar bar. Mınıstrlik mundaı jaǵdaılardy joıý jáne baǵa júıesin jaqsartý boıynsha jumysty jalǵastyrýda.
Satyp alýdaǵy otandyq ónimniń úlesin ulǵaıtý úshin 10 jylǵa deıingi merzimge uzaq merzimdi sharttar jasasý boıynsha qoldaý sharasy kózdelgen. Degenmen, barlyq óndirýshiler men dıstrıbútorlardyń barlyǵy birdeı jeńildikter bermeıdi.
Densaýlyq saqtaý mınıstri farmasevtıkalyq kompanıalardyń ókilderin áleýmettik jaýapkershilikti kórsetýge jáne baǵany tómendetýge qaıta qaraýǵa shaqyrdy.
Vedomstvo satyp alý prosesin ońtaılandyrý jáne barlyq azamattar úshin dári-dármekterdiń qoljetimdiligin qamtamasyz etý boıynsha jumysty jalǵastyrýda.