Qazaqstan Qarýly kúshteriniń jaýyngerleri Túriktiń Izmır qalasyndaǵy «Doǵanbeı» polıgonynda ótip jatqan «Efes – 2022» kópultty jaýyngerlik oqý-jattyǵýyna qatysýda, dep habarlaıdy Almaty-akshamy.kz Inform.kz-ke silteme jasap.
«Oqý-jattyǵý áskerı sheberlik pen jaýyngerlik mashyq deńgeıin arttyrýǵa, sondaı-aq arnaıy operasıalar kúshteri bólimsheleriniń jaýyngerlik daıarlyǵyn jetildirýge baǵyttalǵan. Odan bólek, manevrlerge qatysý áskerlerdiń belgili bir tobynyń quramynda ózara is-qımyldy uıymdastyrý tájirıbesin jınaqtaýǵa múmkindik beredi», - delingen QR Qorǵanys mınıstrliginiń aqparatynda.
Birinshi kezeń kompúterlik tehnıka men elektrondyq-esepteý júıelerin qoldaný arqyly komandalyq-shtabtyq oqý-jattyǵý túrinde ótedi. Al ekinshi kezeńdi birikken bólimshelerde jaýyngerlik atyspen birge praktıkalyq is-qımyl túrinde ótkizý josparlanǵan. Al 28 mamyr - 9 maýsym aralyǵyna josparlanǵan belsendi faza barysynda áskerı qyzmetshiler qurlyqtaǵy jáne teńizdegi operasıalardy birlesip pysyqtaıtyn bolady.
Bıyl «Efes – 2022» oqý-jattyǵýyna shamamen 40 eldiń áskerı qyzmetshileri qatysyp jatyr. Memleket basshysy Qasym-Jomart Toqaevtyń tapsyrmasyna sáıkes, 2022 jylǵy 19 qańtarda Qazaqstan Qarýly kúshteriniń qurylymynda arnaıy operasıalar kúshteriniń qolbasshylyǵy qurylǵanyn atap ótken jón.