Sý tasqynynyń aldyn alýǵa bolady
Qazaqstan mamandary sý aıdynyna ǵaryshtyq monıtorıń júrgizýdiń jańa múmkindikterine ıe boldy, dep habarlaıdy Almaty-akshamy.kz Inform.kz-ke silteme jasap.
«Qazirgi ýaqytta «Qazaqstan Ǵarysh Sapary» UK» AQ (QGS) qyzmetkerleri sý aıdyndary túbiniń bıiktik derekterin alýǵa, olardyń túbin kartaǵa túsirýge múmkindik beretin sıfrlyq batımetrıalyq túsirilimdi engizýde», - dedi Jerdi qashyqtan zondtaý ǵarysh júıesi departamenti dırektorynyń orynbasary Berik Rahymjanov.
Belgili bolǵandaı, mekeme jańa jabdyq – qashyqtan basqarylatyn sıfrlyq dron - Apache 3 ushqyshsyz gıdrografıalyq keshenin satyp alǵan. Bul drondy QR Bilim jáne ǵylym mınıstrligi «Soltústik, Ortalyq jáne Shyǵys Qazaqstannyń iri ózenderi baseıninde sý tasqynyn aldyn alý algorıtmin ázirleı otyryp, keshendi basqarýdyń ǵylymı-qoldanbaly negizderi» nysanaly qarjylandyrý baǵdarlamasy sheńberinde aldy.
«Barlaý jabdyǵynyń bul túri Qazaqstanda alǵash ret qoldanylýda jáne bul tásildi «dál gıdrologıa» dep ataýǵa bolady. Alynǵan málimetter shynaıylyq, naqtylyq jáne aqparatty jınaýdyń joǵary tıimdiligimen erekshelenedi», - dep atap ótti B.Rahymjanov.