Avtomobıl dálizderi jańartylady.
Qazaqstan Úkimeti memleket aýmaǵy arqyly ótetin 8 halyqaralyq tranzıttik avtomobıl dálizin jańartýdy kózdep otyr. Bul jumystardy 2030 jyly aıaqtaýdy josparlaýda. Bul týraly Indýstrıa jáne ınfraqurylymdyq damý mınıstri Qaıyrbek Óskenbaev Úkimet otyrysynda málimdedi, dep habarlaıdy Almaty-akshamy.kz.
«2747 shaqyrymdyq «Batys Eýropa – Batys Qytaı» dáliz Qytaıdan Qazaqstan, Reseı arqyly jáne odan ári Eýropaǵa, sondaı-aq Orta Azıa elderine tranzıttik aǵyndy qamtamasyz etedi. Ony tolyq rekonstrýksıalaý 2009-2017 jyldary júrgizildi. Kólik aǵynynyń artýyna baılanysty 2023-2030 jyldary Qyzylordadan Reseı shekarasyna deıingi uzaqtyǵy 1 363 shaqyrym bolatyn ýchaskeni İ tehnıkalyq sanatqa kezeń-kezeńimen aýystyrý josparlanyp otyr», - delingen mınıstrliktiń habarlamasynda.
«Almaty – Qaraǵandy - Nur-Sultan – Petropavl – Qorǵandaǵy RF shekarasy» dálizimen Orta Azıa elderinen jáne Qytaıdan Qazaqstan, Reseı jáne odan ári Eýropaǵa tranzıt ótedi. «Almaty-Qaraǵandy» ýchaskesin İİ tehnıkalyq sanatqa aýystyra otyryp, 2023 jyly rekonstrýksıalaý kózdelip otyr.
«Nur-Sultan – Qostanaı - Chelábınskidegi RF shekarasy» kólik dáliziniń uzaqtyǵy 860 shaqyrym. Ol Orta Azıa elderinen Qazaqstan, Reseı jáne odan ári Eýropaǵa tranzıttik aǵyndy qamtamasyz etedi. Qozǵalys qarqynynyń artýyna baılanysty «Nur-Sultan – Qostanaı – Chelábınskidegi Reseı shekarasy» ýchaskesin 2023 jylǵa deıin İ tehnıkalyq sanatqa aýystyrý josparlanýda.
«Qytaı shekarasy – Maıqapshaǵaı - Qalbataý – Semeı – Pavlodar -Ombydaǵy RF shekarasy» dálizi - shyǵys óńirdiń negizgi baǵyttarynyń biri. Ol boıynsha tranzıt Qytaıdan Qazaqstan, Reseı aýmaǵy arqyly jáne odan ári Eýropaǵa baǵyttalady. Qazir «Qytaı shekarasy – Maıqapshaǵaı -Qalbataý» ýchaskesin rekonstrýksıalaý júrgizilýde. Jumystar 2023 jyly aıaqtalady.
«Almaty – Taldyqorǵan – Óskemen – Shemonaıha - Barnaýyldaǵy RF shekarasy» kólik dáliziniń uzaqtyǵy 1210 shaqyrym. Bul da Ortalyq Azıa men Qytaıdan Qazaqstan arqyly Reseıdiń shyǵys óńirlerine jáne Qıyr Shyǵysqa tranzıtti qamtamasyz etetin úlken suranysqa ıe baǵyt. Qazir «Taldyqorǵan – Óskemen» avtojoly jańartylýda. Jumystar 2023 jyly tolyq aıaqtalady.
893 shaqyrymdyq «Aqtóbe – Qandyaǵash – Maqat – Atyraý - Astrahandaǵy RF shekarasy» dálizimen Ózbekstan men Túrikmenstannyń Qazaqstan jáne Reseı arqyly Eýropaǵa tranzıti ótedi. «Aqtóbe-Qandyaǵash» jáne «Atyraý-Astrahan» ýchaskelerin 2023 jyly jańartý josparlanyp otyr. Bıyl «Qandyaǵash-Maqat-Atyraý» ýchaskesin rekonstrýksıalaý aıaqtalady.
«Aqtóbe – Oral - Samara» kólik dálizi Oraldan Samaraǵa jáne odan ári Brest arqyly Eýropaǵa aparady.
TRASEKA kólik dálizi qazirgi geosaıası jaǵdaıǵa baılanysty úlken suranysqa ıe. Ol Batys Eýropa - Batys Qytaı dáliziniń negizgi bóligi arqyly ótedi jáne Aqtóbe men Dossor arqyly Qazaqstannyń teńiz porttaryna shyǵady. Aqtaý jáne Quryq teńiz porty arqyly Qytaıdan jáne Orta Azıa elderinen Kavkazǵa jáne odan ári Eýropaǵa tranzıtti qamtamasyz etedi. Qazir «Aqtóbe-Qandyaǵash-Maqat» ýchaskeleri jańartylyp jatyr. «Beıneý-SHalqar-Yrǵyz» ýchaskesin salý boıynsha jobalyq-smetalyq qujattar ázirlenýde. 2025-2028 jyldarǵa josparlanǵan jumystyń nátıjesinde dálizdiń qashyqtyǵy 580 shaqyrymǵa qysqarady.