Tanymal qazaqstandyq marafonshy Marat Jylanbaev Ekibastuz máslıhatyndaǵy depýtat kezinde alǵan altyn tósbelgisin satylymǵa shyǵardy.
Satý týraly habarlandyrýdy óziniń Facebook-paraqshasyna jarıalaǵan Gınness kitabynyń jeti dúrkin rekordsmeni tósbelginiń bastapqy baǵasyn 100 myń teńge dep kórsetken, dep habarlaıdy Almaty-akshamy.kz Elorda.info-ǵa silteme jasap.
Sportshy 375-synamadaǵy altyny bar alty gramdyq tósbelgisin 2003 jyly Ekibastuz máslıhatynyń depýtaty bolyp qaıta saılanǵan kezde alǵanyn aıtady.
«Bul tósbelginiń qandaı aqshaǵa satyp alynǵany áli kúnge deıin qupıa. Zań boıynsha máslıhat depýtattaryna altyn tósbelgi berilmeıdi. Biraq sol kezde ákimdikte Ekibastuzdyń barlyq 17 depýtatyna altyn tósbelgi berildi. Biz oǵan aqy tólemedik. Qazir ol qajetsiz jatyr. Oǵan qosa bul tósbelgimen baılanysty jaǵymsyz estelikter bar. Sondyqtan da ony satýǵa shyǵardym», – dedi Marat Jylanbaev.
Eske sala ketsek, ol - álemdegi eń iri shólderdi jalǵyz ózi júgirip ótken jalǵyz sportshy. Ol Qaraqum, Sahara, Úlken Vıktorıa, Nevada sıaqty shólderdi eńserip, Gınnestiń kitabyna engen, álem boıynsha jeti rekord ornatqan. Jylanbaev jer betindegi eń myqty jáne eń shydamdy adam dep tanyldy. 1995 jyly ol úlken sportty tastap, qoǵamdyq qyzmetpen aınalysty.