Sońǵy 10 jylda $30 mlrd ınvestısıa quıyldy.
Kólik mınıstri Marat Qarabaevtyń aıtýynsha, Qazaqstan aýmaǵy arqyly ótetin tranzıttik júkterdi tasymaldaý ýaqyty 12 kúnnen 5 kúnge deıin qysqarady, dep habarlaıdy Almaty-akshamy.kz
Vedomstvo baspasóz qyzmetiniń habarlaýynsha ınvestısıalar tartý jáne yntymaqtastyq máselelerine arnalǵan jıynǵa 100-den astam sheteldik kásiporyn qatysty.
Qarabaev sońǵy 10 jylda elimizdiń kólik-logıstıkalyq ınfraqurylymyna shamamen $30 mlrd ınvestısıa quıylyp, nátıjesinde 2,5 myń jańa temir jol, 13 myń km avtojol salynǵanyn, sonymen birge 21 mln tonnaǵa Aqtaý jáne Quryq teńiz porttarynyń qýaty keńeıtilgenin, ushý-qoný jolaǵy jáne 22 áýejaıdaǵy termınaldar qaıta jańartylǵanyn atap ótti.
2022 jyldyń qorytyndysy boıynsha salynǵan árbir dollar $4,8 ákelgen, al salada jumyspen qamtylǵan 1 adamǵa shaqqandaǵy eńbek ónimdiligi $21 230 qurady.
Kólik mınıstrligi basshysynyń málimetinshe, qazirgi ýaqytta Qazaqstanda Eýrazıa qurlyǵynyń negizgi saýda marshrýttarymen baılanysty 16 myń km temirjol jáne 95,5 myń shaqyrym avtomobıl joly bar.
"Qazaqstan arqyly 13 halyqaralyq kólik dálizi ótedi, onyń ishinde 5 temirjol jáne 8 avtomobıl joly. 2022 jyly respýblıka aýmaǵy arqyly tranzıttiń jalpy kólemi 23,2 mln tonnaǵa jetti. Bul 2021 jylmen salystyrǵanda 10 paıyzǵa artyq. Eń úlken ósim mýltımodaldy Transkaspıı halyqaralyq kólik marshrýtynda baıqalady. "Tar oryndardy" joıý boıynsha qabyldanyp jatqan sharalardyń nátıjesinde jyl sońyna qaraı júkterdiń orta dáliz boıynsha ótý ýaqyty 3 esege – 38-53 kúnnen 14-18 kúnge deıin, onyń ishinde Qazaqstan aýmaǵy boıynsha – 12 kúnnen 5 kúnge deıin qysqarady", - dedi Marat Qarabaev.