Joǵarǵy Bas qolbasshy áskerı qyzmetshiler aldynda sóz sóıledi
Memleket basshysy oqý-jattyǵý jıynyna jumyldyrylǵan bólimshelerdiń daıyndyq deńgeıine oń baǵa berdi, dep habarlaıdy Almaty-akshamy.kz.
Sonymen qatar Prezıdent bul oqý-jattyǵý jıyndary kúrdeli geosaıası kezeńde ótkizilip otyrǵanyna nazar aýdardy.
«Búginde álemdik qorǵanys júıesinde aýqymdy ózgerister bolyp jatyr. Qazirgi urystardyń ádis-tásilderi de basqa, ásirese, gıbrıdtik soǵys túrleri keń taralýda. Shabýyldar áskerı ǵana emes, aqparattyq, psıhologıalyq, saıası, ekonomıkalyq jáne basqa da sıpat alýy múmkin. Sondyqtan Qazaqstan armıasy kez kelgen syn-qaterge daıyn bolýy qajet. Bul – zamanaýı ári kásibı áskerge qoıylatyn basty talap. Bizdiń bir ǵana Otanymyz bar. Ol – Qazaqstan. Elimizdi, jerimizdi, azamattarymyzdyń qaýipsizdigin qamtamasyz etý, olardy qorǵaý – barshamyzǵa ortaq qasıetti paryz!» – dedi Qasym-Jomart Toqaev.
Prezıdenttiń pikirinshe, bizdiń áskerimiz kásibı deńgeıi joǵary, utqyr jáne eń kúrdeli jaýyngerlik tapsyrmalardy oryndaýǵa daıyn bolýy qajet.
«Ol úshin áskerdi joǵary tehnologıalyq qarý-jaraqpen jáne sapaly áskerı tehnıkamen jaraqtandyrý, oq-dárilermen tolyqtaı qamtamasyz etý aıryqsha mańyzdy. Jaqynda jarıalaǵan Joldaýymda men jergilikti ónim úlesi joǵary óndiris sıklin qurýdy tapsyrdym. Brondy tehnıka, ushqyshsyz basqarylatyn ushý apparattary, zamanaýı atys qarýlary – munyń bárin biz ózimizde shyǵara alamyz. Jalpy, qorǵanys-ónerkásip kesheni áskerimizdiń jaýyngerlik qabiletine senimdi tirek bolýy qajet», – dedi Memleket basshysy.
Aıta keterligi, Memleket basshysy Arnaýly operasıalar kúshteriniń qolbasshylyǵyna Jaýyngerlik týdy saltanatty túrde tabys etti.