Tehnologıa bir orynda turmaıdy
Qazaqstan álemdik kıberqaýipsizdik reıtıńinde 31-orynda. Bul aıtarlyqtaı jaqsy kórsetkish. Sebebi 2015 jyly elimiz aqparattyq júıelerdiń qorǵalýy boıynsha 118-orynda bolatyn, dep habarlaıdy Almaty-akshamy.kz «Habar 24» telearnasyna silteme jasap.
Kıbershabýyldarǵa negizinen memlekettik organdar jáne bank júıeleri jıi ushyraıdy. «Sondyqtan kıberqalqan jasaýmen qatar kompúterlik baǵdarlamalardyń álsiz tustaryn der kezinde anyqtaý mańyzdy», - deıdi Almatyda ótip jatqan kıberqaýipsizdik jónindegi halyqaralyq konferensıaǵa qatysýshylar.
Máselen, bir jylda elimizdiń aqparattyq júıelerinde bir jarym myńǵa jýyq osaldyq anyqtalǵan. Hakerler málimetterdiń tarap ketý joldaryn kórsetti. Osyǵan baılanysty 2020 jyly respýblıkada «Qazaqstannyń kıberqalqany» tujyrymdamasy qabyldanǵan bolatyn. Degenmen, tehnologıa bir orynda turmaıdy. Halyqaralyq konferensıaǵa qatysýshylar kıbershabýyldan saqtanýdyń jańa joldaryn talqylap, elektrondy júıelerdi qorǵaý boıynsha mamandardy jańasha ádispen daıyndaý týraly oılaryn ortaǵa saldy.
«Jas mamandar kıberqaýiptiń aldyn alýdy, júıeni buzýdy meńgerýi tıis. Olar qatardaǵy jaýynger sıaqty bolýy kerek. Kıberqalqan – bul tek antıvırýs, server ǵana emes. Kıberqaýipsizdik úshin mıllıardtaǵan qarjy jumsaǵanmen, eger bilikti maman joq bolsa, bári beker. Búgingi halyqaralyq konferensıa jas mamandar úshin taptyrmas tájirıbelik orta der edim», - deıdi Kıbershabýyldardy taldaý jáne tergeý ortalyǵynyń prezıdenti Oljas Satıev.
«Qazaqstannyń kıberqalqany» tujyrymdamasyna taldaý jasaǵanda aqparattyq qaýipsizdik mamandyǵy boıynsha 60-qa jýyq bilim granty bólingen bolatyn. 4 jyldyń ishinde ol birneshe esege ósti. Qazir 2400 grant bólinedi. Aldaǵy jyldary ony 10 myńǵa jetkizýdi josparlap otyrmyz. Elimizdiń aqparattyq júıeleri laıyqty qorǵalǵan. Birikken Ulttar Uıymynyń reıtıńi memlekettiń kıberqaýipsizdik úshin barlyq qajetti sharalardy qabyldap jatqanyn dáleldeıdi», - deıdi QR SDIAÓM Aqparattyq qaýipsizdik komıteti tóraǵasynyń orynbasary Talǵat Mustaǵulov.