Jańadan taǵaıyndalǵan basshyny ujymǵa Mádenıet jáne sport mınıstri Dáýren Abaev tanystyrdy.
Aqtoty Raıymqulova «Qazaqkonsert» memlekettik konserttik uıymynyń dırektory qyzmetine taǵaıyndaldy, dep habarlaıdy Almaty-akshamy.kz QazAqparatqa silteme jasap.
Aqtoty Raıymqulova – Qazaqstannyń eńbek sińirgen qaıratkeri, ónertaný ǵylymdarynyń doktory. 1987 jyly Qurmanǵazy atyndaǵy Almaty memlekettik konservatorıasyn «kompozısıa» jáne «fortepıano» mamandyǵy boıynsha aıaqtady. Halyqaralyq bıznes akademıasynda bilim alyp, DBA (Doctor of Business Administration) dárejesin alǵan.
Túrli jyldary Qurmanǵazy atyndaǵy Almaty memlekettik konservatorıasynda oqytýshy, kafedra meńgerýshisi, prorektor bolyp eńbek etti.
2014-2016 jyldar aralyǵynda Mádenıet jáne sport mınıstrligi mádenıet jáne óner isteri departamentiniń dırektory bolyp jumys istedi.
2016 jyly Mádenıet jáne sport vıse-mınıstri, 2019-2022 jj. aralyǵynda QR Mádenıet jáne sport mınıstri qyzmetterin atqardy.
Buǵan qosa, Aqtoty Raıymqulova kóptegen ǵylymı eńbekterdiń avtory, mýzykalyq shyǵarmalardyń, kórkem fılmderge arnalǵan saýndtrekterdiń kompozıtory bolyp tabylady. Eske salsaq, "Qazaqkonsert" – elimizdegi eń iri konserttik uıymdardyń biri. 60 jyldyq tarıhy bar bul uıym 2016 jyldan beri óz jumysyn elordada jalǵastyryp keledi. Uıym «Qazaqstan» ortalyq konsert zalynda ornalasqan. Konserttik mekemeniń Almaty qalasynda fılıaly bar.
2021 jyly uıymǵa KSRO jáne Qazaqstannyń halyq ártisi, Halyq qaharmany Roza Baǵlanovanyń esimi berildi. «Qazaqkonsert» uıymynda elimizdiń úzdik ártisteri men shyǵarmashylyq ujymdary bas qosqan. Munda mýzykalyq ónerdiń fólklor, klasıka, estrada, múzıkl teatry sıaqty janrlary usynylǵan.
Shyǵarmashylyq quramǵa «Astana sazy» qazaq memlekettik fólklorlyq ansambli, «Forte trıo» memlekettik trıosy, Qazaq memlekettik sımfonıalyq orkestri, «Astana Musical» memlekettik teatry, «Klasıkalyq óner» bólimi, «Halyq qazynasy» óner ujymy, «Saz&soul» vokaldyq-aspaptyq ansambli, elimizge jáne álemge tanymal estradalyq ánshiler men toptar kiredi. Qazaqkonsert respýblıkalyq jáne halyqaralyq jobalardy júzege asyryp, belsendi gastróldik qyzmet júrgizýde.