Roza Baǵlanova atyndaǵy «Qazaqkonsert» memlekettik akademıalyq konserttik uıymynyń «Birlik» ansambli Túrkıada ótip jatqan «Altynqaragóz atyndaǵy 36-shy Dúnıejúzilik halyq bı baıqaýyna» qatysyp jatyr.
TÚRKSOI men Túrkıanyń Býrsa qalasynyń ákimdigi birlese uıymdastyrǵan baıqaýǵa túrkitildes elderdiń úzdik ulttyq jáne bı ujymdary qatysady.
«Birlik» ansambli baıqaýda «Qamshyger», «Jiger», «Kúı shashý» atty horeografıalyq kompozısıalardy usynbaq. Sondaı-aq, ansámbldiń kórkemdik jetekshisi Anel Marabaeva «Shara» atty jeke kompozısıasyn oryndaıdy.
«Birlik» án-bı ansambli – kóp ultty elimizdiń mádenı baılyǵyn pash etetin birlik pen úılesimniń nyshanyna aınalǵan ujym. Ansámbldiń ónerdegi maqsaty – ózara qurmet, birlik pen tatýlyq syndy qundylyqtardy nasıhattaı otyryp, qazirgi qoǵamdaǵy atalǵan qundylyqtardyń mańyzyn mádenıet pen óner arqyly kópshilikke jetkizý.