Bul týraly kınostýdıa ujymymen basshylyqtyń kezekti jınalysynda aıtyldy.
Kezdesýde «Qazaqfılm» kınostýdıasynyń uıymdastyrý qurylymy men eńbekaqy tóleý tetiginiń jobasyn ázirleý jónindegi qyzmetkerler men jumys berýshi ókilderi komısıasynyń qorytyndysy shyǵaryldy, dep habarlaıdy Almaty-akshamy.kz.
Kınostýdıa prezıdenti Aqan Sataevtyń aıtýynsha, qazirgi ýaqytta arnaıy komısıa damý vektorlaryn, eńbekaqy tóleýdi qalyptastyrý prınsıpterin jáne uıymdastyrý qurylymyn anyqtaldy. Uıymnyń shtattyq quramy men sany qalyptastyryldy.
«Sizderdi jaqsy jańalyqpen qýantqym keledi. 1 qyrkúıekten bastap jalpy kınostýdıa boıynsha qyzmetkerlerdiń jalaqysy orta eseppen 30%-ǵa ósedi. Mádenıet mınıstrligi tarapynan, pıchıngte óz jobalaryn qorǵaǵan avtorlar tarapynan úlken qoldaý kórsetildi. Biz jalaqyny kóterdik jáne osymen shektelmeımiz dep úmittenemin. Osy oraıda stýdıanyń jetistigi árqaısymyzǵa baılanysty ekenin atap ótkim keledi. Sondyqtan sizderdi ári qaraı da jaýapty bolýǵa jáne jaqsy jumys isteýge shaqyramyn», - dedi A.Sataev.
Kezdesý barysynda kınostýdıanyń senarılik-redaksıalyq alqa jumysy barynsha qolǵa alynatyny aıtyldy.
Uıymdastyrý qurylymyn reformalaýda basty nazar senarılik-redaksıalyq alqanyń jumysyna jáne otandyq kórermender talap etetin sapaly fılmder shyǵarýǵa aýdarylady. Kınostýdıaǵa arnalǵan klasıkalyq bólimshelerden basqa qurylymǵa ǵylymı-zertteý kınolaboratorıasy, kınostýdıanyń sıfrlyq transformasıasyna jaýap beretin baǵdarlamalyq-tehnıkalyq basqarý jáne damý bólimi engiziledi. Sondaı-aq, marketıń bólimi men baspasóz qyzmetiniń jumysyn kúsheıtý josparlanýda.
Memlekettik baǵdarlamany iske asyrý maqsatynda «Qazaqanımasıa» shyǵarmashylyq birlestigi qurylady. Búginde kınostýdıa «Ulttyq kınony qoldaý memlekettik ortalyǵy» júrgizgen pıchıng nátıjeleri boıynsha, sondaı-aq quqyǵy «Qazaqfılmge» tıesili klasıkalyq qazaqstandyq kıno qoryn restavrasıalaý baǵdarlamasyn iske qosý boıynsha jumysqa kiristi.
Kınostýdıada 2021 jyly bastalǵan belsendi jańǵyrtý baǵdarlamasy jalǵasýda. Injenerlik jeliler men ǵımarattarǵa tehnıkalyq qaıta jaraqtandyrý, kúrdeli jóndeý júrgizý, sondaı-aq túsirilim pavılondaryn salý kózdeledi. Atalǵan jumystar kınostýdıany jańa halyqaralyq deńgeıge shyǵarýǵa jáne Ortalyq Azıa óńirinde jetekshi orynǵa shyǵýǵa múmkindik bermek.
Jańǵyrtý aıasynda úsh negizgi ǵımaratta: plenkaly-zerthanalyq keshen, 2 pavılondy blok pen ton-stýdıada jumystar bastaldy. Sondaı-aq, taǵy da qosymsha úsh ǵımarat salý josparlanýda. Bul - eki pavılondy jáne bir úlken qoıma blogy. Sondaı-aq, jazǵy kınoteatr men murajaı salý mindeti de qoıylǵan. Kınostýdıanyń barlyq ınfraqurylymy kezeń-kezeńimen jańartylady.