Anımatorlar sheteldik mamandardan dáris alady
«Qazaqfılm» kınostýdıasynyń bazasynda «Qazaqanımasıa» shyǵarmashylyq birlestigi qurylady, dep habarlaıdy Almaty-akshamy.kz. Bul týraly Mádenıet jáne sport mınıstri Dáýren Abaev óziniń Facebook paraqshasynda jazdy.
«Ózderińizge belgili, jas urpaq tárbıesi anımasıamen tyǵyz baılanysty. Qazirgi tańda búlidirshinderimiz batystan úzdiksiz kelip jatqan sheteldik ónimderdi qarap, tilimizge de, dilimizge de qaıshy múltfılmderdi kóptep kórip jatqany jasyryn emes»,- dedi ol.
Jyl sońyna deıin birlestik on pılottyq jobany usynady, al talantty jas anımatorlar sheteldik mamandardan arnaıy dáris alady.
«Biz osy jumystar arqyly ulttyq anımasıanyń básekege qabilettiligin arttyryp, ol ónimderdi úlken prokatqa shyǵarýdy josparlaımyz. Zaman kóshinen qalmaı, bilimdi de bilikti shyǵarmashyl jastarymyzdy qoldap, jańa ıdeıalar men tyń bastamalarǵa yńǵaıly alań jasaýymyz qajet. Aýdıtorıa suranysyn qanaǵattandyratyn sapaly kontent qalyptasyryp, sheteldik áriptestermen tyǵyz baılanys negizinde qazaq anımasıasyn halyqaralyq dárejege kóteremiz dep senemin»,- dedi Dáýren Abaev.