Sh.Shaıahmetov atyndaǵy «Til-Qazyna» UǴPO 2024 jyldyń shilde aıynda memlekettik tilde kompúterlik oıyn ázirleýshiler arasynda hakaton ótkizbek.
1-oryn úshin – 3 mıllıon teńge. Baıqaý Qazaqstan Respýblıkasynda til saıasatyn damytýdyń 2023-2029 jyldarǵa arnalǵan tujyrymdamasy aıasynda júzege asyrylady, dep habarlaıdy Almaty-akshamy.kz.
TIL-QAZYNA PLAYGROUND atty baıqaýda úmitker komandalar ózara baq synasady. Hakatonnyń maqsat-mindeti – oıyn arqyly qazaq tilin úıretýdiń tyń ıdeıalaryn jınaqtaý, qoǵamǵa qajetti qazaq tilinde kompúterlik oıyn ázirleý, sol arqyly memlekettik tilde sóıleýshiler sanyn arttyrý, oıyn daıyndaý salasyndaǵy jas mamandardy yntalandyryp, olardyń tyń ıdeıalaryn nasıhattaý.
Saıys sharty boıynsha saıys barysynda qatysýshylar geımdızaın, kompúterlik oıyn prototıpi men demo nusqasyn daıyndaýy qajet.
Komandalardyń ótinimin qabyldaý jáne tirkeý 2024 jyldyń 18 maýsym – 5 shilde aralyǵynda júrgiziledi. İrikteýden barlyǵy 5 komanda ǵana ótedi. Baıqaý 2 kezeńnen turady. 1-kezeń – irikteý, 2-kezeń – jeńimpazdy anyqtaý. İrikteýden ótken 5 komanda Astana Hub-ta ótetin oflaın formattaǵy 2-kezeńge shaqyrylyp, qazylar alqasy aldynda jumystaryn qorǵaıdy. 1-orynǵa ıe bolǵan 1 komandaǵa 3 000 000 tg qarjylaı syılyq nemese jobany tolyq aıaqtaý úshin arnaıy shart jasalady.