Kýrsanttan generalǵa deıin: Almatyda alǵash ret polıseıdiń ómiri týraly múzıkl sahnalandy
Almaty Theatre-da ishki ister organdar ardagerlerine, polısıa qyzmetkerleriniń qyzmettik mindetin atqarý kezinde qaza tapqandardyń týystaryna, qalalyq polısıa departamentiniń qyzmetteri men bólimsheleriniń jeke quramyna arnalǵan merekelik konsert ótti. İs-sharaǵa Almaty qalasynyń ákimi Erbolat Dosaev qatysty, dep habarlaıdy Almaty-akshamy.kz.
Qazaqstan Respýblıkasynyń memlekettik ánuranyn oryndaǵannan keıin konserttiń shymyldyǵy İİD orkestriniń oryndaýyndaǵy «Gúl Almatym» kompozısıasy jáne «Sarmat» balalar ujymy men «Saltanat» bı ansambliniń horeografıalyq qoıylymymen ashyldy.
Alǵash ret tártip saqshylarynyń kúshimen İİM Akademıasynyń kýrsantynan generalǵa deıin bir polıseıdiń damý tarıhyn somdaýmen múzıkl uıymdastyryldy. Sondaı-aq, kórermenderge teatr nómirleri bar merekelik baǵdarlama usynyldy.
Almaty óziniń erekshe ári qaıtalanbas kelbetin saqtap qana qoımaı, jyl sanap damyp, órkendep keledi. Qalanyń jetistigine, quqyq tártibin qamtamasyz etýge jáne qylmysqa qarsy kúreske Almaty polıseıleri de laıyqty úles qosyp otyr.
«Búginde Almaty polısıasy qylmysqa qarsy shabýyldyq kúresti júzege asyrý, quqyqtyq tártipti nyǵaıtý jáne qalada qaýipsizdikti qamtamasyz etý úshin barlyq qajetti jaǵdaı men múmkindikterge ıe. Qazaqstannyń tártip saqshylary – memleket pen turǵyndardyń qaýipsizdiginiń kepili. Biz qala turǵyndary men qonaqtarynyń qaýipsiz ómir súrýine jaǵdaı jasaı otyryp, Otan aldyndaǵy qyzmettik boryshyn adal atqaratyn polısıa qyzmetkerlerimen maqtanamyz», - dedi Almaty qalasy polısıa departamentiniń bastyǵy Arystanǵanı Zapparov.
Sondaı-aq, konsertke «Dos-Muqasan» ansambli, Tóreǵalı Tóreáli, Mádı Ahmetqoja, Ál-Nasyr qatysty. Mereke «Abyroı» tobynyń oryndaýyndaǵy «Rýh» patrıottyq ánimen aıaqtaldy.
Búginde qazaqstandyq polıseıler ishki ister organdarynyń qurylǵanyna 32 jyl tolýyn atap ótip jatyr.