Abaıdan rýhanı azyq alatyn ustaz
«Almatynyń jyl muǵalimi» baıqaýynyń Gran-prı ıegeri qazaq tili men ádebıeti pániniń oqytýshysy Nurjigit Amanov qala ákiminiń qolynan eki bólmeli páterdiń kiltin alǵan bolatyn. Ol qala boıynsha iriktelip alynǵan 31 ustazdyń ishinen úzdik shyqqan, dep habarlaıdy Almaty-akshamy.kz
Qazirgi tańda Nurjigit Amanov Almatydaǵy áıgili rejıser Sultanahmet Qojyqov atyndaǵy №39 mamandandyrylǵan lıseıde qazaq tili men ádebıeti pániniń muǵalimi bolyp qyzmet atqarady.
Ustaz sıfrlyq bilim berý tehnologıasyn jasap shyqqan. Onyń aıtýynsha, qazirgi zaman oqýshylarynyń bilimdi qabyldaý qabileti, burynǵy kezben salystyrǵanda ózgeshe. Balalarǵa birden qabyldap, alatyndaı erekshe dúnıe qajet.
«Men «New generation» – sıfrlyq bilim berý tehnologıasyn jazyp shyqtym. Ol qazirgi zamanǵa saı jazylǵan. Bul - oqýshy men ustazdyń bilim berýdegi araqatynasyn jetildire túsetin aqparattyq tehnologıa. Qazirgi zaman oqýshylarynyń qabyldaý qabileti, burynǵy kezben salystyrǵanda basqasha. Bul – sıfrlyq bilim berý tehnologıasy QQQ+TTT=F bilim berý formýlasy. «New generation»degen formýlaǵa negizdelgen. «New generation»– sıqyrly bilim berý jobasy arqyly beriletin árbir sabaq qyzyqty, qıyn, qundy bolý kerek. Talǵamyn, tanymyn damytyp, taldaı bilý. Oqýshynyń boıynda osy 6 qabilet bolsa, onda baladan fýnksıonaldyq saýattylyq qalyptasqan tulǵa shyǵady. Qazirgi tańda osy tehnologıany mektepte qoldanyp jatyrmyz. Degenmen biz, ustazdar, «jańashyldyq», «jańarý degen osy eken» dep, ótkennen qol úzip ketýge bolmaıdy. Bilim berýdegi jańashyldyq álemdik standartqa jaýap bergenimen, tárbıe berýdegi ádis-tásilderimiz ata-babamyz san ǵasyrlar boıy qalyptastyrǵan standartqa saı bolýy kerek. Sonda ǵana qazaq ulty túrli órkenıetter aǵymynda ketpeı, ózindik bolmysyn saqtap qalatyn bolady», – deıdi muǵalim.
Nurjigit Amanov - bala kezden Abaıdy oqyp, ózine rýhanı azyq alatyn ustaz. «Abaı álemi» jobasyn jasaǵan. Sonymen qatar mekteptegi bilim josparyna da Abaıdyń shyǵarmasy men óleńderin engizgen. Ár sabaq saıyn 5 mınýt Abaıǵa toqtalady.
«Jobanyń «Abaı álemi» dep atalýynyń basty sebebi – Abaıdan búkil adam rýhanı azyq alady. Mekteptiń basty baǵyty ne? Kez kelgen nárseniń tálim-tárbıelik máni eskeriledi. Sol sekildi Abaı nege mán berdi? Biz de soǵan mán bere otyryp jasadyq. Men ár sabaǵymnyń 5 mınýtyn Abaıǵa arnaımyn. Jańa aıtyp ótkendeı, «New generation» jobasyna árbir sabaqqa Abaıdyń óleńderin, shyǵarmalaryn engizip, jospar jasaǵam», – deıdi ol.
Aıta keteıik, «Abaı álemi» jobasy Abaıdyń 175 jyldyǵyna oraı uıymdastyrylǵan. Atalmysh joba búkil qala boıynsha eń úzdik joba retinde tanylyp, arnaıy bilim basqarmasynyń marapatyna ıe bolǵan. Almatynyń jyl muǵalimi uıymdastyrýshylarǵa alǵys bildirdi.