Qazaq Stroy kompanıasy ata-anasynan aıyrylǵan tórt balaǵa úsh bólmeli páter syılady. Bul týraly Aqshamnews.kz saıty habarlaıdy.
Balalardyń ákesi Erkebulan Sydyqbaev 2022 jylǵy Qańtar oqıǵasy kezinde qaza tapsa, anasy Saıa Esengeldi jol-kólik apatynan mert bolǵan.
"Qazaq Stroy ujymy ata-anasyz qalǵan tórt balanyń taǵdyryna beı-jaı qaraı almady. Saıa Esengeldi balalary úshin ómiriniń sońyna deıin kúresti, bul bizdi tereń tebirentti. Bir-birimizge qoldaý kórsetý – bizdi myqty ult etetin qasıet. Sondyqtan bul balalardyń baspanasyz qalýyna jol bere almadyq", – dedi kompanıa ókilderi.
Kompanıanyń negizin qalaýshy Nurlan Artyqbaev balalar kámelettik jasqa tolǵansha olarǵa aı saıyn 100 000 teńgeden járdemaqy tólep otyrýdy sheshti.
"Biz balalardyń qaıǵysyn jeńildete almaımyz, biraq olardyń bolashaǵy úshin qol ushyn soza alamyz. Qazaqtyń kúshi – birliginde, bir-birine demeý bolýynda. Bul úı balalar úshin úmit pen jylylyq mekeni bolady dep senemiz", – dedi Nurlan Artyqbaev.
Qazaq Stroy kompanıasy balalarǵa páterdiń kilti men menshik sertıfıkatyn tabystady.
"Qaıǵyny sózben ólsheý múmkin emes, ata-ananyń orny tolmaıdy. Biraq biz janashyrlyq pen meıirimniń álemdi jaryq ete alatynyna senemiz. Saıa Esengeldiniń týǵan-týystaryna kóńil aıtamyz. Balalaryna bolashaqta jylýlyq pen qamqorlyq jetispesin dep tileımiz", – dep málimdedi kompanıa.
Kilt sózder: Qazaq Stroy, qaıyrymdylyq, jetim balalar, baspana syılaý, Nurlan Artyqbaev, Qańtar oqıǵasy.