Heımısh Pols Atyraýda 2017 jyldan beri turady.
Ol bos ýaqytynda qazaq halqynyń rýlaryn zertteıdi eken, dep habarlaıdy Almaty-akshamy.kz AtyrauPress-ke silteme jasap.
Sheteldik Heımısh Pols qazaqtyń rýlaryn, etnıkalyq quramy men halyqtyń basqa da erekshelikterin jaqsy biletin bolyp shyqty. Kishi júzdiń barlyq rýyn, onyń ishinde 4 taıpa men 31 rý baryn da aıtyp otyr.
Jergilikti jerdegi birlesken kompanıanyń birinde qyzmet etetin Heımısh Pols Atyraýda 2017 jyldan beri turady. Osy ýaqyt ishinde qazaq halqynyń salt-dástúri men mádenıeti jaıly kóp maǵlumat alǵan. Bos ýaqytynda qazaq halqynyń rýlaryn zertteıdi eken. Onyń aıtýynsha, https://news.google.com/bul aqparat arqyly ózine jańalyqtar ashypty.
«Men bir halyqtyń rýlarǵa qalaı bólinetinin bilgim keldi. Qazaqstanda 200-den astam rý bar. Qazir men kishi júzdiń rýlaryn ǵana jatqa bilemin. Jyl saıyn áriptesterimmen birge men de kóktemniń kelgenin atap ótýdi unatamyn. Al, qazaq mádenıetine toqtalsaq, meni olardyń rýlary qatty qyzyqtyrady. Ýaqyt tabyla qalsa, bárin úırenýge asyǵamyn», - deıdi ol.
Qazaq halqynyń óz ulttyq kıimderin kıip júrgeni ony erekshe qýantady eken. Ol qazaq kıimderiniń ásemdigin erekshe atap ótti. Oıý-órnekter kóktemniń kelýin beıneleıtindeı.
«Baýyrsaq pen naýryz kójeniń dámin tatyp kórdim. Qatty unady. Ózimniń ulttyq kıimim bar. Ony arnaıy merekelerge kıip júremin. Oıý-órnekteri men tústeri kóńil-kúıimdi kóteredi. Basqalardan múldem erekshe. Munda adamdar óte meıirimdi, qonaqjaı. Bul jerdiń tabıǵaty da bólek», - deıdi Heımısh Pols.
Budan bólek, qazaqtyń ulttyq oıyndary men mýzykalyq aspaptaryn da unatady. Ol jaqynda asyq pen láńgi oınaýdy úırenipti. Onyń paıymdaýynsha, asyq dáldikti, ustamdylyqty, tapqyrlyqty damytyp, durys esepteýdi úıretedi. Al, láńgi eptilikti jetildiredi.
«Ulttyq oıyndardy maǵan kenje ulym úıretti. Ol Atyraýda oqyp júrip úırenip alǵan. Sondaı-aq, 15 jastaǵy ulym dombyra tarta alady. Qazir alty kúıdi erkin oryndaıdy. Bizdiń súıikti kúılerimiz – «Adaı» men «Balbyraýyn». Meniń túsingenimdeı, bul – Atyraýdaǵy eń tanymal shyǵarmalar», - deıdi H.Pols.