Rejıser Erenbaq Toıkenov halyqaralyq «Nano-Opera» jas rejıserler baıqaýynyń irikteýinen ótken tarıhtaǵy alǵashqy qazaqstandyq atandy.
Ol eki júzden asa adamnyń ishinen júldeli orynǵa úmitker on qatysýshynyń qataryna kirdi, dep habarlaıdy Almaty-akshamy.kz QazAqparatqa silteme jasap.
«Nano-Opera» baıqaýy 2013 jyldan beri eki jylda bir ótedi. Joǵary kásibı qazylar alqasynyń quramynda kórkemdik jetekshiler, jetekshi halyqaralyq opera teatrlarynyń dırektorlary men rejıserleri, tanymal teatr menedjerleri men prodúserleri bar. Eń mańyzdy marapat – baıqaýdyń bas-júldesi – «Gelıkon-operada» spektákl qoıýǵa, sondaı-aq basqa da opera teatrlarynda qoıylymǵa sertıfıkat alady.
«Mýzykalyq teatrdyń rejıserler baıqaýy - álemdik mádenı keńistiktegi óte sırek jaǵdaı, al «Nano-Opera» – álemde baǵalanatyn úsh baıqaýdyń biri. İrikteý kezeńinen ótý úshin álemdik klasıkalyq repertýardan operalyq spektákl jaıly ózińniń kórgen-túıgenderińdi qaǵaz kúıinde usyný kerek. Meniń tańdaýym Dj.Pýchchınıdiń jaýhary «Týrandot» operasyna tústi, sebebi hıkaıanyń basty keıipkeri Kalaf – noǵaı áýletiniń ókili, al noǵaılar – Qazaqstannyń etnıkalyq toby. Buǵan deıin Germanıada Camerata Nuova baıqaýyna qatysqanymdy, sol kezde de 2 júzden astam úmitkerdiń arasynan aqtyq toǵyzdyqqa engen tarıhtaǵy tuńǵysh qazaqstandyq bolǵanymdy aıta ketkim keledi», – dedi Erenbaq Toıkenov.
Aıta keteıik, baıqaý qatysýshylary «Gelıkon-opera» teatry solıserimen birge birinshi kezeńde arıanyń, ekinshi kezeńde dýettiń, úshinshi kezeńde opera solıseri jáne hor ártisterimen kópshilik sahna qoıylymdaryn oryndaıdy. Sahnalyq nómirlerdi jasaý jurtshylyq aldynda ótedi.