Jınaqqa 1954 jyldan bergi saqtalǵan túpnusqa aýdıolar engizildi.
QR Aqparat jáne damý mınıstrliginiń qoldaýymen Qazaq radıosynyń 100 jyldyǵyna oraı «Altyn qor. Amanat» aýdıojınaǵy jaryqqa shyqty, dep habarlaıdy Almaty-akshamy.kz
«Amanat» aýdıojınaǵyna «Altyn qordaǵy» qundy habarlar men qazaq án-kúı óneriniń injý-marjany engizilgen.
«Qazaqstan» teleradıokorporasıasynyń «Altyn qorynda» 1940 jyldarynan beri saqtalǵan 110 myńnan asa tarıhı-jádigerlik beıne jáne aýdıotaspa saqtalǵan. Taspalardyń jalpy uzaqtyǵy 42 myń saǵatty quraıdy.
Aýdıojınaq «Dáýir úni», «Atadan qalǵan asyl sóz», «Batyrlar jyry», «Án óneri», «Kúı», «Salt-dástúr» jáne «Ertegi» dep atalatyn 7 bólimnen turady. «Dáýir úni» bóliminde M.Erjanov, M.Áýezov, S.Muqanov, İ.Esenberlın, A.Súleımenov, B.Soqpaqbaev, Ǵ.Músirepov, M.Álimbaev syndy 100 ult qaıratkeriniń ár jyldary jazylǵan daýystary túpnusqada berildi.
«Atadan qalǵan asyl sóz» bóliminde 1948 jyldan bastap fólklorǵa qatysty Qazaqstan tóńireginde júrgizilgen túrli ekspedısıalardaǵy kónekóz qarıalardyń sheshendik óner jaıyndaǵy suhbattary qamtylǵan. Suhbattardyń uzaqtyǵy 35 saǵatty quraıdy.
«Batyrlar jyry» bóliminde 50 biregeı nusqasy jazylǵan. «Án óneri» taraýynda Q.Baıjanov, K.Ázirbaev, Q.Babaqov, Á.Qashaýbaev, J.Elebekov, J.Kármenov, J.Omarova, Ǵ.Qurmanǵalıev, M.Eshekeev, S.Ábeýov sıaqty qazaq án óneri maıtalmandarynyń daýysy saqtalǵan aýdıorolıkterdi tyńdaýǵa bolady.
Qazaq radıosynyń «Altyn qorynda» elimizdiń birtýar tulǵalarynyń syr-suhbatymen qatar, 1948 jyldan bergi jınaqtalǵan qazaq kúıiniń mol qory saqtalǵan. D.Nurpeıisova, L.Muhıtov, Q.Jantileýov, N.Tilendıev, Sh.Ábiltaevtyń oryndaýyndaǵy 100 kúı aýdıojınaqtyń «Kúı» dep atalatyn taraýyna jınaqtalǵan. «Syńsý», Besik jyry, «Jar-jar», «Betashar», «Jarapazan», Joqtaý» syndy turmystyq-ǵuryptyq ánderi «Salt-dástúr» bóliminde qamtyldy. Qazaq radıosynda 1959 jyldan bastap «Ertegi» aıdarymen 350 habar daıyndalǵan. Habarlar «Erden atanyń ertegileri», «Zámzágúl ájeniń ertegileri», «Aıdos atanyń ertegileri» jáne «Saýyq ájeniń ertegileri» degen ataýmen jańartylyp, jınaqqa ár jyldary jazylǵan 100 ertegi nusqasy engizildi.
Aýdıojınaqtyń basty ereksheligi - usynylǵan týyndylar arnaıy flesh-kardqa jazylǵan: ár bólimniń sońyndaǵy QR-kod arqyly radıo saıtynan jáne korporasıanyń altynqor.com portalynan jınaqtyń elektrondy nusqasyn tyńdaýǵa bolady. Atalǵan biregeı materıal mektep oqýshylary men stýdentterge qoljetimdi bolýy úshin oblys ortalyqtary men elimizdiń joǵary oqý oryndaryndaǵy kitaphanalarǵa jetkiziledi dep josparlanýda. Bul Táýelsiz Qazaqstannyń ósip kele jatqan jas býynyna mádenı muralardy nasıhattaýǵa da úles qosady.