Jol-jónekeı jabaıy ańdar kezdespeı-aq qoısa dep tiledim...
Nur-Sultan qalasynyń turǵyny Áıgerim Álimova 4270 shaqyrymdyq Tynyq muhıty jotasyn (Pacific Crest Trail - PCT) jaıaý júrip ótti, dep habarlaıdy Almaty-akshamy.kz.
Tengritravel.kz-tiń málimetinshe, otandasymyz Meksıka shekarasynan Kanadaǵa deıingi shóleıtti, bıik taýly ári jabaıy janýarlary kóp aralyqty 4,5 aıda júrip ótken.
«Alǵash Tynyq muhıty joly jaıly amerıkalyq jazýshy Sherıl Streıdtiń avtobıografıasy boıynsha túsirilgen «Jabaıy» fılminen bildim. Qaýipti saıahat ózińizdi tabýdyń joly ispetti. Bul fılm maǵan qatty unady, óıtkeni bas keıipker ekeýimizdiń jolymyz uqsas boldy»,-deıdi Á. Álimova.
Keıin ol osyndaı saıahatty jalǵyz ózim eńsere alamyn ba dep kóp oılanǵan.
«Ol kezde zańger bolyp jumys isteıtin edim. Bir kúni úıge kelip, jumystan shyǵamyn da velosıpedpen saıahattaýǵa shyǵamyn dep aıttym. Basynda jaqyndarym olaı isteme dep meni raısymnan qaıtarǵylary keldi, biraq sońynda meni qoldady. Jumystan shyqqan kezimde qurbym AQSH-qa barý úshin grın-kartaǵa ótinim berdi. Bul ıdeıaǵa bastapqyda mán bermedim, keıin men de ótinim berdi, biraq bul qadam ómirimdi 360 gradýsqa ózgertedi dep oılamadym»,-deıdi saıahatshy.
Áıgerim jumystan shyqqan soń velosıpedpen saıahattaýǵa attanyp, Qyrǵyzstan, Tájikstan, Grýzıa, Armenıa, Túrkıa jáne Qazaqstannyń jarty bóligin aralap shyqqan.
«2018 jyly AQSH-qa grın-kartany utyp aldym. Al, 2019 jyly shýaqty Kalıfornıaǵa qonys aýdardym. 2020 jyldyń basynda Tynyq muhıty jolymen júrip ótýdi josparladym, alaıda pandemıa bastalyp, saıahatty 2021 jylǵa qaldyrýǵa týra keldi»,-deıdi ol.
Saıahat barysynda ol shóleıtti jáne muzdy qyrattardy basyp ótkenin, jol jónekeı jabaıy ańdarǵa tap bolǵanyn aıtady.
«Jolǵa shyqqanda jabaıy ańdar shyqpaı-aq qoısa eken dep tiledim. Alaıda 600 shaqyrym jol júrgen soń qońyr aıýmen kezdestim. Jolǵa shyqpas buryn ańdardy kórseń qozǵalma degen keńes alǵanmyn. Degenmen maǵan qaraǵanda aıý qatty qoryqqan sıaqty kórindi. Keıin ormanda jalǵyz aıaq jolmen kele jatqanymda kenetten aldymnan qara aıý shyǵa keldi. Únsiz tura qaldym, ol kelip meni ıiskeledi de, óz jónine ketti»,-deıdi Áıgerim.
Sondaı-aq jol-jónekeı kezdesken jolaýshylar Qazaqstannan kelgen saıahatshyny alǵash kórgenderin aıtypty.
«Saıahat kezinde 4500 metrli taýlardy basyp ótý qıyn boldy. Oǵan bir kún ýaqytyń ketedi. Jalpy 4,5 aı júrgende onyń 20-25 kúni eldimekenderge turaqtaýǵa ketti. Iaǵnı, demalyp, qajetti azyq-túlik pen sý alý úshin toqtap otyrdym. Jol boıynda 100-110 kúnim ketti»,-deıdi jas saıahatshy.