Aryq júıeleri de retke keltiriledi
Almaty oblysynyń ákimi Qanat Bozymbaev óńirlerge saparyn Qarasaı aýdanynda jalǵastyrdy. Munda ınfraqurylymdyq, ónerkásiptik, áleýmettik-mádenı nysandardy aralap, problemalyq máselelerdiń sheshilý joldaryn talqylady, - dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Oblys ákimi eń birinshi Qaskeleń toptyq sý qubyry qurylysynyń jobasymen tanysty. Oǵan respýblıkalyq búdjetten 12 mlrd teńge bólingen. Nysan Qaskeleń qalasymen qatar 18 eldi mekendi aýyz sýmen úzdiksiz qamtı alady.
Búgingi kúni jobanyń İ kezeginiń 1-shi iske qosý kesheni tolyǵymen aıaqtalǵan. Bas sý qoımasynan Qaskeleńge deıin sý tazartý stansasy arqyly qubyr tartylǵan. Sonyń arqasynda turǵyndar sapaly aýyz sýǵa qol jetkizetin bolady. Qazirgi kezde qujattardy tirkeý jumystary júrip jatyr. Sondaı-aq 2 jáne 3-shi iske qosý kesheni jobasynyń aıasynda magıstraldy sý qubyry men jetkizý jelileri qurylysynyń jobasy memlekettik saraptamadan ótkizilýde. Munan keıin eldi mekender ishine rezervýarlar men sorǵy stansalary ornatylatyn bolady.
«Qarasaı aýdanynyń, sonyń ishinde Almaty qalasy mańyndaǵy eldimekenderdiń de sýmen qamtý máselesin aldaǵy eki-úsh jyl kóleminde sheshýimiz kerek. Bul – basymdyq beretin mindet. Baý-baqsha sýarýda másele týyndamaý úshin aryq júıelerin de retke keltirýimiz kerek. Bul máseleni sheshýge aýdan ákimdigi qazirden kirisýi tıis», - dedi Qanat Bozymbaev.
Munan soń Qanat Bozymbaev Qazaqstan Respýblıkasy Tuńǵysh Prezıdentiniń «Atameken» tarıhı-mádenı ortalyǵyn aralap, odan ári «Úshqońyr» dene shynyqtyrý-saýyqtyrý keshenine keldi.
Sport kesheni holynda oblys ákimine 2018 jyly bekitilgen Almaty oblysy aýmaǵynyń qala qurylystyq josparlaýynyń keshendi syzbasy men Qaskeleń qalasynyń bas jospary tanystyryldy. Josparlar jaıyn «Ýrbostıl» JSHS jetekshisi Lúbov Nysanbaeva baıandady.
«Almatyǵa jaqyn jatqan aýdandardy tıimdi damytý úshin jumystyń negizgi prınsıpterin Almaty qalasy ákimdigimen kelisip atqarýymyz kerek. Birlesip sheshetin máseleler óte kóp. Qaskeleń qalasynyń bas josparyna keletin bolsaq, ony iske asyrý úshin ınyvestorlar tartqan jón. 2022 jylǵa egjeı-tegjeıli jospar daıyndaý kerek. Qaskeleńniń úlgili qala bolýǵa barlyq múmkindigi bar. Onyń ústine kólik ınfraqurylymyn damytý jumystary bastaldy», - dep atap ótti Q.Bozymbaev.
Osy jerde «Altyn orda» saýda-logıstıkalyq kesheniniń egjeı-tegjeıli jobasy, sol sıaqty Tuńǵysh Prezıdent saıabaǵy qurylysynyń jospary da kórsetildi. Tuńǵysh Prezıdent saıabaǵynyń jobasyn júzege asyrýdy baqylaý tapsyryldy. Aldymen jer ýchaskesi belgilenip, odan keıin naqty jobasy daıyndala bastaýy tıis.
Sporttyq keshenniń ishin aralap, barlyq materıaldyq-tehnıkalyq múmkindikterimen tanysqannan soń Qanat Bozymbaev Qarasaı, Jambyl, İle aýdandarynyń balalary úshin sport ınternatyn salý jobasyn daıyndaýdy tapsyrdy.