Qazaqstan men Qyrǵyzstan Jambyl oblysynyń sýarmaly jerine sý berý týraly kelisimge keldi. Bishkekte ótken kezdesýde Sý resýrstary jáne ırrıgasıa mınıstri Nurjan Nurjigitov kelisimge keldi, dep habarlaıdy almaty-akshamy.kz
Kelissóz nátıjesinde Talas ózenindegi «Túıte» kanaly arqyly sý berýdi qalpyna keltirý boıynsha jumys júrgizý týraly sheshim qabyldandy.
Sý resýrstary jáne ırrıgasıa mınıstri Nurjan Nurjigitovtiń Qyrǵyz eli Aýyl sharýashylyq mınıstri Asqarbek Jánibekovpen kezdesýi kezinde Shý jáne Talas ózenderindegi (memleketaralyq paıdalanýdaǵy) sý sharýashylyǵy qurylystaryn paıdalaný jónindegi birlesken Komısıaǵa tapsyrma berildi.
Sondaı-aq, Nurjan Nurjigitov elimizge sý jiberýdi jaqsartý úshin memleketaralyq paıdalanýdaǵy sý sharýashylyǵy nysany tizbesin keńeıtý qajettigin atap ótti.
Máselen, bizdiń tarap osy tizbege Kúrkiresý ózenindegi «Aqmolda», «Qarataqy» jáne «Tómentamǵa» arnalaryn, Shý ózenindegi «Kolos» kanalyn, Talas ózenindegi «Koj» kanalyn engizýdi usynady.
Shý jáne Talas ózenderinde sý sharýashylyǵy qurylystaryn paıdalaný jónindegi birlesken Komısıanyń kelesi otyrysy 14 jeltoqsanda Almatyda ótedi.
Buǵan deıin Nurjan Nurjigitov ózbekstandyq áriptesterimen kezdesip, 1 sáýirge deıin Túrkistan jáne Qyzylorda oblystaryna 11,1 tekshe shaqyrym sý, onyń ishinde Aral teńizine 1,6 mlrd tekshe metr sý jiberý týraly kelisimge kelgen bolatyn.