Atalǵan ortalyqty «Atameken» keden beketi men «Syrdarıa» keden beketiniń mańynan qurý týraly usynystar qaraldy.
Qazaq-ózbek shekarasynda «Ortalyq Azıa» halyqaralyq ónerkásiptik kooperasıa ortalyǵy qurylady, dep habarlaıdy Almaty-akshamy.kz
QR Saýda jáne ıntegrasıa vıse-mınıstri Qaırat Tórebaev Maqtaaral aýdanyna jumys saparymen kelip, ortalyqty qurýǵa tańdalǵan jer telimderimen tanysty.
Túrkistan oblysy ákiminiń orynbasary Ermek Kenjehanuly kóliktik ınfraqurylymnyń jaı-kúıi týraly baıandap, josparlarmen tanystyrdy.
Aýdan ákimi Baqyt Asanov «Atameken» kedendik beketiniń mańyndaǵy 50 gektar jer týraly aıtyp ótip, atalǵan jerge elektr, gaz, aýyz sý júıelerin jetkizý boıynsha da baıandady. Sonymen qatar kóliktik ınfraqurylymnyń jaı-kúıi, týyndap jatqan máseleler jaıly da keńinen málimdedi. «Ortalyq Azıa» halyqaralyq ónerkásiptik kooperasıa ortalyǵyn «Syrdarıa» shekara ótkizý beketinen qurý yńǵaılyraq ekenin túsindirdi. Óıtkeni, bul jerden M-39 «Tashkent-Termez» halyqaralyq avtomobıl joly ótedi sondaı-aq tıisti ınfraqurylymdardy tarta otyryp ónerkásiptik jáne saýda-sattyq oryndaryn ashýǵa, jańa jumys oryndaryn kóbeıtýge jol ashylmaq.
Vıse-mınıstrge 2023-2024 jyldary josparlanyp otyrǵan «Atameken» keden beketin modernızasıalaýǵa jumsalatyn qarjyny «Syrdarıa» keden beketine baǵyttaý, «Maqtaaral-Darbaza» temir jolyn Atameken keden beketinen «Syrdarıa» shekara ótkizý beketine deıin tartýǵa yqpal etý jóninde usynys berildi.
Jıyn sońynda vıse-mınıstr jaǵdaımen tolyq tanysyp, aladǵy ýaqytta aıtylǵan usynystardy saraptaıtynyn jetkizdi. Sondaı-aq aýdandaǵy temirjol júıesiniń jaı-kúıimen tanysyp, ınfraqurylymdy jaqsartýǵa qoldaý bolatynyn jetkizdi. Jergilikti atqarýshy organdarǵa osy baǵyttaǵy jumystardy júıeleý tapsyryldy.