Bıyl ulttyq mýzykalyq óner tarıhynda ózindik orynǵa ıe Qazaqstan kompozıtory, Qazaqstannyń Memlekettik syılyǵynyń laýreaty, KSRO Halyq ártisi Sydyq Muhamedjanovtyń (1924-1991) 100 jyldyq mereıtoıy atalyp ótýde. Osyǵan baılanysty M.O.Áýezov atyndaǵy Ádebıet jáne óner ınstıtýtynyń ǵalymdary «Mýzykataný ǵylymyndaǵy belgili tulǵalar» atty dóńgelek ústel uıymdastyryp, «Sydyq Muhamedjanovtyń shyǵarmashylyǵy: ýaqyt enshisindegi ǵasyrlar úni» atty jınaqty jaryqqa shyǵaryp, tusaýkeser rásimin ótkizdi, dep habarlaıdy aqshamnews.kz
Alqaly jıyndy M.O.Áýezov atyndaǵy Ádebıet jáne óner ınstıtýtynyń bas dırektory, fılologıa ǵylymdarynyń doktory, QR UǴA akademıgi Kenjehan İslámjanuly Matyjanov basqardy.
Dóńgelek ústelge Qazaqstannyń Eńbek eri, Jambyl Jabaev jáne Shyńǵys Aıtmatov atyndaǵy Halyqaralyq syılyqtardyń ıegeri, Qazaqstan Respýblıkasy men Qyrǵyzstannyń Eńbek sińirgen qaıratkeri, jazýshy, kompozıtor, ónertanýshy, sýretshi İlıa Jaqanov, Halyq jazýshysy, dramatýrg, aqyn, Halyqaralyq «Alash» ádebı syılyǵynyń ıegeri Sofy Qalybekuly Smataı, QR Bilim berý isiniń qurmetti qyzmetkeri, Qurmanǵazy atyndaǵy Qazaq Ulttyq konservatorıasynyń Qurmetti profesory, dosent, Qurmanǵazy orkestriniń ardageri Ótepbergen Hamzın, Fılosofıa, saıasattaný jáne dintaný ınstıtýtynyń «Qazaq fılosofıasy» sektorynyń meńgerýshisi, fılosofıa ǵylymdarynyń doktory Gaýhar Barlybaeva, Merki aýdandyq tarıhı-ólketaný mýzeıiniń dırektory Aıdyn Bazılov, Qazaq ulttyq óner ýnıversıtetiniń profesory, QR Mádenıet salasynyń úzdigi, ónertaný doktory, profesor Dana Júnisbekqyzy Jumabekova, Qazaq ulttyq óner ýnıversıtetiniń profesory, QR Eńbek sińirgen qaıratkeri, ónertaný kandıdaty Toıjan Jylqaıdarqyzy Eginbaeva jáne M.O. Áýezov atyndaǵy Ádebıet jáne óner ınstıtýtynyń Mýzykataný bóliminiń meńgerýshisi, ónertaný kandıdaty, qaýymdastyrylǵan profesor Aınur Qaztýǵanova qatysty.
Sondaı-aq, jıynǵa Qurmanǵazy atyndaǵy Qazaq ulttyq konservatorıasy men T.Júrgenov atyndaǵy Qazaq ulttyq óner akademıasynyń oqytýshy ókilderi de keldi.
Qalyń oqyrmanǵa jol tartqan eńbekte S.Muhamedjanovtyń qalamynan týǵan maqalalarymen birge, kompozıtordyń ómiri men shyǵarmashylyǵy týraly materıaldar kórinis tapqan.
Kitaptyń alǵashqy bóliminde S.Muhamedjanovtyń merzimdi basylymdarda jaryq kórgen maqalalary jınaqtalyp, alǵash ret oqyrmandarǵa usynyldy. Ekinshi bólimge kompozıtordyń shyǵarmashylyq izdenisteri, jetistikteri, sondaı-aq, aǵa býyn kompozıtorlar men mýzykalyq qoǵam týraly pikirleri, tilshilerge bergen suhbattary endi.
Úshinshi bólimde S.Muhamedjanovtyń ómiri men shyǵarmashylyq jolyna, jeke týyndylarynyń kórkemdik qundylyǵyna qyzyǵýshylyq tanytqan jazýshylar (M.Álimbaev, S.Smataı, İ.Jaqanov), mýzykatanýshylar (M.Ahmetova, J.Rsaldın, A.Kelberg jáne t.b.) jáne kompozıtorlardyń (L.Hamıdı, E.Rahmadıev jáne t.b.) maqalalary berilgen.
Sonymen qatar, keıingi býyn zertteýshilerdiń de eńbekteri jınaqqa engizilip, jańasha zertteýlerdiń nátıjeleri baıandalǵan.
Kitapta Sydyq Muhamedjanovtyń mýzykalyq shyǵarmalarynan úlgiler jáne muraǵattyq fotosýretter berilgen. Mereıtoılyq basylym polıgrafıalyq sapasy jaǵynan da joǵary deńgeıde oryndalǵan.
İs-sharada Qazaqstan Respýblıkasynyń Eńbek sińirgen qaıratkeri Gúlnar Shahanqyzy Jıdılovanyń súıemeldeýimen Abaı atyndaǵy Qazaq memlekettik opera jáne balet teatrynyń jas solıseri S.M.Muhamedjanovtyń ánderi men operasynan úzindiler oryndady.
Bul eńbek óner, mádenıet, tarıh salasynyń mamandaryna, oqý oryndarynyń bilim alýshylaryna jáne jalpy jurtshylyqqa arnalǵan. Kompozıtor Sydyq Muhamedjanovtyń shyǵarmashylyǵyna arnalǵan tuńǵysh eńbektiń oqyrmandary kóp bolady dep senemiz.