Óskemendegi Qajymuqan Muńaıtpasov atyndaǵy jekpe-jek saraıynda Ulttyq ulan Bas qolbasshysynyń kýbogy úshin qazaqsha kúresten jeke jáne komandalyq chempıonat ótti, dep habarlaıdy almaty-akshamy.kz Ulttyq ulannyń baspasóz qyzmetine silteme jasap
Jarys 1995 jylǵy 7 sáýirde tájik-aýǵan shekarasynda qaza tapqan Qazaqstan İİM İshki áskeriniń 17 jaýyngerin eske alýǵa arnaldy.
Chempıonatqa qatysýshylar aldymen tájik-aýǵan shekarasynda qaza tapqan jaýyngerlerdi bir mınýt únsizdikpen eske aldy.
«Shyǵys» óńirlik qolbasshylyǵynyń qolbasshysy, general-maıor Arman Jumaǵalıev ulttyq sportty ulyqtaý mańyzdy ekenin atap ótti.
-Prezıdent Qasym-Jomart Toqaev Qazaqstan halqyna Joldaýynda salaýatty ómir saltyn jáne buqaralyq sportty onyń ishinde ulttyq sport túrlerin damytýdy nasıhattaý memlekettiń mańyzdy mindeti ekenin aıtty. Qazaq kúresi – áskerı qyzmetshilerdiń denesin shıratyp, eptilikke baýlıtyn ulttyq sport túri. Kúres jigitterimizdiń rýhyn kóterip, tózimin shyndaıdy, shydamdy bolýǵa tárbıeleıdi. Munyń bári áskerı qyzmetshilerimizge júktelgen tapsyrmalardy oryndaýda zor paıdasyn tıgizedi, - dedi ol.
Chempıonatqa 7 komanda qatysty. Olar – «Shyǵys», «Ońtústik», «Ortalyq», «Batys» óńirlik qolbasshylyqtarynyń, Ulttyq ulan akademıasynyń jáne tikeleı baǵynystaǵy №6654 áskerı bólimi men №5573 brıgadasynyń qurama komandalary.
Ulttyq ulan Bas qolbasshylyǵy Dene daıarlyǵy jáne sport bóliminiń basshysy Sátjan Ábishev jarystyń deńgeıi joǵary ekenin atap ótti.
-Munda respýblıkalyq deńgeıde baq synap júrgen sportshy sarbazdarymyz da qatysyp jatyr. Bıyl ulttyq sport túrin damytý úshin İshki ister mınıstri men onyń orynbasary ári Ulttyq ulannyń bas qolbasshysy general-leıtenant Erkin Botaqanovtyń qoldaýymen alǵash ret osyndaı chempıonat ótkizilip otyr. Búgingi bizdiń birinshilik irikteý esebinde bolady, - dedi polkovnık.
Onyń aıtýynsha, osy chempıonatta jeńiske jetkender 1-3 sáýir aralyǵynda Shýchınskte ótetin İshki ister mınıstriniń kýbogynda Ulttyq ulannyń namysyn qorǵaıdy.
- 21-23 mamyr aralyǵynda Qyzylordada UQK kýbogy uıymdastyrylady. Top jarǵan sarbazdar bıyl shildede Astanada ótetin «Qazaqstan barysy» saıysyna da qatysa alady, - dedi polkovnık Sátjan Ábishev.
Jarystyń qorytyndysy boıynsha komandalyq esepte bas júldeni astanalyq №5573 brıgadasynyń quramasy jeńip alsa, ekinshi oryndy «Batys» óńirlik qolbasshylyǵynyń qurama komandasy ıelendi. Úshinshi oryn "Ortalyq" óńirlik qolbasshylyǵynyń quramasyna buıyrdy.