22 mamyrda Abaı atyndaǵy Qazaq ulttyq opera jáne balet teatry Evgenıı Brýsılovskııdiń «Qyz Jibek» operasyn usynady.
Bul qoıylym qazaq klasıkalyq óneriniń negizin qalaǵan úsh tulǵanyń – Evgenıı Brýsılovskıı, Qanabek Baıseıitov jáne Qurmanbek Jandarbekovtiń 120 jyldyq mereıtoılaryna arnalady. Qazaq opera óneriniń altyn qoryna engen «Qyz Jibek» operasynyń premerasy 1934 jylǵy 7 qarashada ótti.
Bas partıalardy oryndaǵan Kúlásh Baıseıitova, Qurmanbek Jandarbekov pen Qanabek Baıseıitov týyndynyń mýzykalyq materıalyn tańdaýda, sondaı-aq kompozıtorǵa qazaq mýzykasyn meńgerýge kómektesti. Operanyń mýzykasy halyq fólkloryna negizdelgen, 50-den astam kúı men án engen.
Alǵashqy rejıserler – Qanabek Baıseıitov pen Jumat Shanın, lıbretto avtory – Ǵabıt Músirepov.
«Qandaı mýzyka jazsam da – qazaqsha shyǵatyn» degen Evgenıı Brýsılovskııdiń shyǵarmashylyǵy qazaq ulttyq operasy men kásibı mýzykalyq mádenıetiniń damýyna zor úles qosty. Ol – qazaq kompozıtorlyq mektebiniń negizin qalaýshylardyń biri, tuńǵysh operalar men sımfonıalardyń avtory. Onyń qalamynan toǵyz opera, tórt balet, toǵyz sımfonıa jáne bes júzden astam án men romans týǵan.
Sonymen qatar, ol 1945–1992 jáne 1992–2006 jyldar aralyǵyndaǵy Qazaqstan Respýblıkasynyń Memlekettik ánurany avtorlarynyń biri.
Qanabek Baıseıitov – Qazaq KSR-iniń halyq artısi, Memlekettik syılyqtyń laýreaty, qazaq mýzykalyq teatry men ulttyq opera óneriniń negizin qalaýshylardyń biri. Rejıser, opera ánshisi, dramatýrg, teatr jáne kıno akteri. 20-dan astam operany sahnalap, 17 kórkem fılmge túsken. «Abaı» operasyndaǵy Abaı róli – shyǵarmashylyǵynyń shyńy.
Qurmanbek Jandarbekov – Qazaq KSR-iniń halyq artısi, akter, rejıser, ustaz. Qazaqtyń kásibı drama jáne mýzykalyq teatrynyń negizin qalaýshy. Abaı atyndaǵy teatrdyń qurylýyna qatysqan. Jubaıy Shara Jıenqulovamen birge qazaq bı ónerin qaıta jandandyryp, ulttyq baletterdi sahnalady. Ol 10 opera men 3 baletti qoıǵan, olardyń qatarynda qazaq balet ónerindegi alǵashqy týyndy – «Qalqaman men Mamyr» bar.